Саха сирин агропромышленнай комплекса: сайдыы саҥа суоллара — 3 июля 2026 г. в 05:16:31.167
Саха сирин агропромышленнай комплекса: сайдыы саҥа суоллара От ыйын 1 күнүгэр 1 №-дээх Бырабыыталыстыба дьиэтигэр Уһук Хоту дойдуга племенной сулууспа 75 сылыгар аналлаах аан дойдутааҕы форум чэрчитинэн, Саха сиригэр Россия Тыатын хаһаайыстыбатын министиэристибэтин уонна Россия наукаларын академиятын бэрэстэбиитэллэрин кытта сүбэ-мунньах буолла. Кэпсэтии сүрүн тиэмэлэринэн племенной базаны бөҕөргөтүү, тыа хаһаайыстыбатын инфраструктуратын саҥардыы, сылгы, таба иитиитин өйөөһүн уонна саха ынаҕын харыстааһын буоллулар. Ил Дархан Айсен Николаев Уһук Хотугу сир усулуобуйатыгар агропромышленнай комплексы сайыннарыыга бэйэтин ураты этиилэрин киллэрдэ. Манна инфраструктураны, технологическай уонна ветеринарнай кыһалҕалары учуоттаан, хотугу норуоттар үгэстэригэр тирэҕирэр, аныгы ирдэбилгэ эппиэттиир саҥа ньымалары тобулуу соруга турда. Саха сиригэр аан дойдуга суох хотугу сүөһү иитиитин баай уопута мунньуллубута бэлиэтэннэ. Тэрээһиҥҥэ Ил Дархан бу күн бочуоттаах ыалдьыттар ортолоругар «Удьуор» бааһынай хаһаайыстыба салайааччыта, Үлэ Албан Аатын уордьанын толору кавалера, Россия Үлэҕэ Дьоруойа Михаил Николаевич Готовцев баарын иһитиннэрдэ. Быйыл Михаил Николаевич 80 сааһын бэлиэтиибит. Айсен Сергеевич Михаил Николаевич төрөөбүт дойдутун агропромышленнай комплексын сайыннарыыга киллэрбит сүдү кылаатын этэн туран, билигин даҕаны илиитин араарбакка айымньылаахтык үлэлээн-хамсаан эдэр көлүөнэҕэ үтүө холобур буола сылдьарын бэлиэтээтэ, итиэннэ Михаил Николаевичка чөл туругу, уһун үйэни баҕарда. СӨ Бырабыыталыстыбатын бэрэссэдээтэлин солбуйааччы Сергей Местников тыа хаһаайыстыбатыгар биир сүрүн приоритетынан сүөһү иитиитин, таба иитиитин уонна сылгы иитиитин сайыннарыыга туһуламмыт государственнай племенной политика буоларын эттэ. Племенной үлэ сыала-соруга сүөһү ахсаанын хаҥатыы, боруода тупсарыыта, итиэннэ оҥорон таһаарар бородууксуйаны элбэтии буоларын, бүгүн саха ынаҕа оннунан хаалан, туруктаах ахсааҥҥа тахсыбыта, бу сулууспа бэтэрээннэрин үлэлэрин түмүгэ буоларын бэлиэтээтэ. Маны сэргэ, Саха сиригэр ынах сүөһүнү искусственнай сиэмэлээһин оператордарын ортолоругар «Идэтинэн Бастыҥ» профессиональнай маастарыстыба XXII республикатааҕы куонкуруһун кыайыылаахтарын уонна призердарын наҕараадалаатылар. Бу күрэххэ Уус Алдан улууһун Лөгөй нэһилиэгиттэн Валериан Стручков ситиһиилээхтик кыттан, анал бириис хаһаайынынан буолла. Улуус дьаһалтатын пресс-сулууспата.