Бүгүн улуус баһылыгын бастакы солбуйааччыта Семен Бурнашев салайааччылаах нэһилиэнньэ о... — 29 июня 2026 г. в 10:36:01.429
Бүгүн улуус баһылыгын бастакы солбуйааччыта Семен Бурнашев салайааччылаах нэһилиэнньэ олоҕор суолталаах экология боппуруостарыгар анаммыт суһал мунньах ыытылынна. Мунньахха Саха Өрөспүүбүлүкэтин Экологияҕа, айылҕаны туһаныыга уонна ойуур хаһаайыстыбатыгар министиэристибэтин Уус Алданнааҕы иниспиэксийэтэ, Роспотребнадзор управлениетын Уус Алданнааҕы территориальнай салаата уонна улуустааҕы административнай хамыыһыйа кыттыыны ыллылар. Мунньахха сүрүн боппуруоһунан Мүрү нэһилиэгин иһинэн баар бөҕү тоҕор сирдэртэн мунньуллубут бөҕү хомуйуу кыһалҕата турда. Бу боппуруос экология туругар уонна нэһилиэнньэ доруобуйатыгар быһаччы дьайар буолан, ордук сытыытык турда. Иккиһинэн, бөҕү тоҕор сирдэри элбэтии уонна бөһүөлэк сорох өттүгэр мунньуллубут бөх киэҥ сиринэн ыһыллан, айылҕаны киртитии улааппыта бэлиэтэннэ. Бу боппуруоһу быһаарарга, улуус дьаһалтатын таһымыгар анал хамыыһыйанан рейдэ оҥоһулларыгар сорук турда. Мунньах түмүгүнэн, бөҕү хомуйар оператор салайааччытыгар бөҕү аҕыйах кэм иһигэр хомуйарга чопчу сорудах бэрилиннэ. Ол сорудах кэмигэр толоруллубатаҕына, оператор экологияны киртитии иһин эппиэтинэскэ тардыллыаҕа. Улуус дьаһалтатын пресс-сулууспата.