Салгыы улуус баһылыга Василий Алексеев Билии күнүнэн Түүлээх нэһилиэгин үөрэнээччилэрин... — 1 сентября 2026 г. в 14:44:27.389
Салгыы улуус баһылыга Василий Алексеев Билии күнүнэн Түүлээх нэһилиэгин үөрэнээччилэрин, учууталларын уонна төрөппүттэри эҕэрдэлээтэ. Түүлээх нэһилиэгэ ааспыт үөрэх дьылыгар айымньылаахтык үлэлээн, учууталлар бырайыактарынан эколого-краеведческай хайысханы тутуһан, өрөспүүбүлүкэтээҕи инновационнай былаһаакка статуһун сүкпүттэр. Бу ситиһии хас биирдии учуутал сыралаах үлэтин түмүгэ. Сүрүн болҕомтону бу эйгэҕэ ууран, экологическай тропа бырайыагын оҥорон, быйыл олоххо киирэригэр үлэлэһэллэр. Икки сыл устата экологическай лааҕыр үлэлээн, оҕолорго айылҕаны харыстыырга, таптыырга угуйда, үөрэттэ. Ону таһынан үөрэнээччилэр араас научнай-практическай конференцияларга, куонкурустарга көхтөөхтүк кыттан, нэһилиэктэрин аатын ааттаттылар. Ол курдук «Движение Первых» хамсааһын чэрчитинэн, 10 кылаас үөрэнээччилэрэ Хабаровскай куоракка ыытыллыбыт Бүтүн Арассыыйатааҕы «Школьные спасательные отряды» күрэхтэһиигэ дойду үрдүнэн бастыҥнар ахсааннарыгар киирэн, үһүс миэстэни ылары ситиспиттэрэ. Маны сэргэ, Москваҕа ыытыллар научнай-практическай конференцияҕа кыттарга мэктиэ суругу туппуттара. Профессиональнай идэҕэ туһаайыыга эмиэ үрдүк көрдөрүүлээхтэр. Ол курдук «Моя профессия IT» улуустааҕы күрэх кыайыылаахтара. Оҕолор үөрэххэ эрэ буолбакка, ырыа-үҥкүү куонкурустарыгар куруутун ситиһиилээхтик кытталлар. Биир кэлим экзамены туттарыыга үрдүк көрдөрүүнү ситиһэн, улууска үчүгэй көрдөрүүлээхтэр. Выпускниктар 3 оҕо үрдүк үөрэх кыһатыгар, 2 оҕо орто анал үөрэххэ, 1 оҕо тохсус кылаас кэнниттэн салгыы үөрэнэ барбыттар. Быйыл маҥнайгы кылааска 2 оҕо үөрэнэ киирэр. Уопсайа 38 оҕо саҥа үөрэх дьылын көрсөр. Улуус баһылыга Василий Петрович нэһилиэк оҕолоро өрүү маннык дьулуурдаахтык үөрэнэн, сайдан өссө үрдүк ситиһиилэри дабайа туралларыгар, саҥа үөрэх дьыла саҥа саҕахтары арыйа турарыгар баҕарда. Улуус дьаһалтатын пресс-сулууспата.