Сэтинньи 4 күнүгэр Дүпсүн нэһилиэгэр Сомоҕолоһуу күнүгэр аналлаах "Эйэ, доҕордоһуу, сом...
Сэтинньи 4 күнүгэр Дүпсүн нэһилиэгэр Сомоҕолоһуу күнүгэр аналлаах "Эйэ, доҕордоһуу, сомоҕолоһуу" диэн улахан бырааһынньыктааҕы кэнсиэр "Дүөндү" сынньалаҥ киинигэр үрдүк таһымнаахтык буолан ааста. Бу бэлиэ күҥҥэ нэһилиэк бары тэрилтэлэрэ, түмсүүлэрэ уонна айар коллективтара олус көхтөөхтүк кытыннылар. Кэнсиэр эйэлээх, сомоҕолоһуулаах буолуу чаҕылхай көстүүтэ 15 Союзнай республикалар танастарын кэтэн оскуолабыт алын сүһүөҕүн кылааһын оҕолорун үҥкүүлэринэн саҕаланна. Олохтоох библиотека үлэһитэ Прасковья Сивцева көрөөччүлэргэ викторина ыытта, кыайыылаахтарга бэлэх туттартаата. Оҕо саас аптаах эйгэтин арыйар, кэрэни эрэ кэрэхсиир умсулҕаннаах “Карнайдаах уол”диэн остуоруйаны Дүпсүн орто оскуолатын коллектива олус үчүгэйдик, интэриэһинэйдик оонньоон бары Узбекистан кэрэ дойдутугар тиийэ сырыттыбыт. Уһуйааммыт үлэһиттэрэ, иитээччилэрэ куруук оҕо иитиитигэр эрэ буолбакка, айар ускуустуба улуу күүһүгэр эмиэ улахан талааннаахтарын көрдөрдүлэр. Кинилэр кыргыыс кэрэчээн кыргыттарын уобараһыгар киирэн, сыанаҕа нарын кэрэ хамсаныылаах үҥкүүнү бэлэхтээтилэр. Биһиги эмчиттэрбит мэлдьи үлэ үөһүгэр сылдьаллар. Кинилэр күн аайы маҥан халааттарын кэтэн хас биирдии киһиэхэ эрэли, олоххо күүһү бэлэхтииллэр. Бүгүн кинилэр айар куттарын арыйан, сыанаҕа дьиҥнээх солун көстүүнү бэлэхтээтилэр. Олохтоох дьаһалтаттан солбуйар баһылыкпыт Арсалан Антонович Прибылых хомус дьүрүскэн тыаһынан дьону сөхтөрдө. Салайааччыбыт айар куттааҕа, үгүс өрүттээх таланнааҕа уонна төрүт култуурабытын үрдүктүк тутара көрөөччүлэри сэргэхситтэ, итиэннэ хас бирдии киһиэхэ ураты киэн туттуу сылаас өйдөбүлүн хаалларда. "Дүөндү" сынньалаҥ киинин үлэһиттэрэ көрдөөх сыаҥкалары көрдөрдүлэр. Кинилэр чаҕылхай оонньуулара, ураты уобарастара зал иьин күлүүнэн толордо. Сынньалаҥ киинин үлэһиттэрин айар куттара уонна маастарыстыбалара бүгүҥҥү бырааһынньыктааҕы тэрээһини өссө тыыннаах, ураты уоттаах-төлөннөөх онордо. Аҕам саастаах дьоммут "Далбар", "Иэйии" ансаамбыллара ылбаҕай ырыаны, сахалыы тыыннаах үҥкүүнү бэлэхтээтилэр.Ытык мааны дьоммут бэйэлэрин чаҕылхай нүөмэрдэринэн бырааһынньыкка ураты сылаас, истиҥ ситими уонна уйан иэйиини сыдьаайдылар. Эдэр көлүөнэ үҥкүүһүттэрэ «Тэтим» үҥкүү бөлөҕө, оскуола үөрэнээччилэрин дьиэрэҥкэй үҥкүүлэрэ ис киирбэх хамсаныылара көрөөччүгэ умнуллубат сырдык иэйиини тиэртэ. Кэрэ куоластаах джаз матыыптаах ырыанан Наталья Бочкарёва олус истиҥник, ис киирбэх ритмы ситимнээн, сонун, кэрэхсэбиллээх ырыаны бэлэхтээн дьон биһирэбилин ылыан ылла. Сынньалан киин саҥа специалиһа Тарас Свинобоев гитаралаах ырыата нэһилиэк олохтоохторугар соһуччу бэлэх буолла. Көрөөччүлэр хас бирдии ырыаны, хамсаныыны уйадыйан туран көрдүлэр уонна дохсун ытыс тыаһынан барҕа махталларын ууннулар. Кырачаан оҕолорбут бэйэлэрин эҕэрдэ ырыаларынан, хоһооннорунан дьон сэргэ биһирэбилин ыллылар. Тэрээһиммит түмүктэниитэ бука бары үөрэн - көтөн төгүрүччү тураммыт Эйэ оһуохайын оһуохайдаатыбыт. Оһуохайы Дүпсүн орто оскуолатын 7 кылааһын үөрэнээччитэ Дамира Дорофеева таһаарда. Бу күн көрөөччүлэр араас омук култууратын үрдүк таһымнаах айар толоруутун көрөн улаханнык үөрдүлэр, хас биирдии нүөмэри итиитик - истиҥник уруйдаан көрүстүлэр. Тэрилтэлэр бу курдук уобарастарын ситиһиилээхтик арыйан, араас омук таҥаһын - сабын, үгэһин тиэрдибиттэрэ кэнсиэр сүрүн киэргэлэ буолла. Бу тэрээһин нэһилиэк олохтоохторун өссө төгүл сомоҕолоото, бэйэ - бэйэҕэ истиҥ сыһыаны уонна кэскилгэ эрэли күүһүртэ. Дүпсүннэр бу курдук үөрүүлээх, өрө көтөҕүллүүлээх быһыыга - майгыга доҕордоһуу уонна сомоҕолоһуу күнүн үрдүк таһымҥа бэлиэтээтилэр! Тэрээһиҥҥэ кыттыбыт бары тэрилтэлэргэ, олохтоохторго истиҥ махталбытын тиэрдэбит! Дүпсүн нэһилиэгэр өрүү эйэ, сомоҕолоһуу уонна сайдыы өрөгөйдөөтүн! ✍Александра Молокотина
Канал в каталоге Максиметера
502 подписчиков · Госорганы и учреждения