📚Бүгүн, сэтинньи 6 күнүгэр, «Олоҥхо дьиэтэ» этно-культурнай кииҥҥэ нэһилиэк түмсүүлэрэ...
📚Бүгүн, сэтинньи 6 күнүгэр, «Олоҥхо дьиэтэ» этно-культурнай кииҥҥэ нэһилиэк түмсүүлэрэ үөрэх тэрилтэлэрин кытта ситимнээх үлэтин тэрийэр, оҕолорго норуот үтүө үгэстэрин тарҕатар, үгэстэри туттан төрүт үөрүйэхтэри иҥэрэр сыаллаах-соруктаах «Көлүөнэ ситимэ» улуустааҕы норуот педагогикатын сугулаана ыытылынна. Кыттыыны ыллылар нэһилиэк баһылыктара, түмсүүлэр салайааччылара уонна чилиэннэрэ, дириэктэрдэр, сэбиэдиссэйдэр, дириэктэри иитэр үлэҕэ солбуйааччылар, дириэктэр сүбэһиттэрэ, саха тылын, төрүт култуура учууталлара, библиотекардар, баспытааталлар, төрөппүттэр. Сугулааны арыйда Үөрэх управлениетын начальнига Федор Федорович Татаринов. Бэйэлэрин уопуттарын атастастылар, оҕону иитэр-үөрэтэр, төрүт үгэстэри иҥэрэр ньымаларын кэпсээтилэр: 🔹Бэрт-Ууһун нэһилиэгин тимир уустарын, эбээ, эһээ түмсүүлэрэ, Сыырдаах орто оскуолата үлэлэрин уопута; 🔹В.В. Алексеев аатынан Мүрүтээҕи уолаттар гимназияларын дириэктэри иитэр үлэҕэ солбуйааччыта У.В. Колодезников – төрөппүтү кытта үлэ уопута; 🔹Суотту орто оскуолата оҕону үлэ үөрүйэхтэригэр иитэр үлэтин уопута; 🔹Уһун-Күөллээҕи «Чуораанчык» оҕо уһуйаана өбүгэлэрбит үгэстэригэр олоҕуран эбээ үөрэҕин нөҥүө иитии уопута; 🔹Баатаҕай «Күнчээн» оҕо уһуйаанын баспытаатала С.И. Ядрихинская – саха төрүт үгэстэригэр оскуола иннинээҕи саастаах оҕолору иитии уопута; 🔹Мүрүтээҕи эдэр натуралистар станцияларын педагога В.Н. Бурцев – «Ойуур оскуолата», булт педагогикатын уопута; 🔹Өспөх орто оскуолатын дириэктэри иитэр үлэҕэ солбуйааччыта А.Е. Румянцева – «Сиэрдьит» күн-дьыл эргииринэн иитии-үөрэтии бырайыага; 🔹Педагогическай үлэ бэтэрээнэ, РФ суруналыыстарын сойууһун чилиэнэ Г.Н. Иванова – Айтыына – «Удьуор утума», «Кэскил түһэ» бырайыактары үөрэх тэрилтэлэригэр билиһиннэрии. 📍Түмүккэ оҕону иитиигэ, норуот үгэстэрин туттан төрүт үөрүйэхтэри иҥэриигэ хас биирдии нэһилиэк, оскуола, уһуйаан, педагог, төрөппүт бэйэтин кылаатын киллэриэхтээҕэ бэлиэтэннэ. Сугулааҥҥа уопуттарын үллэстибит тэрилтэлэр баай уопуттарыттан тирэх ылан, салҕыы үлэни кэҥэтии соруга турда. 🇷🇺Тэрээһин биир долгутуулаах түгэнинэн Арассыыйа Дьоруойа Андрей Григорьев–Тута ыалдьыттааһына буолла. Кини бойобуой суолун, хорсун быһыытын, туох күүс-уох киниэхэ тирэх буола сылдьыбытын кэпсээтэ, бэйэтин санаатын үллэһиннэ. 📚Салҕыы Масаха Мэхээс «Кэрэхсэбиллээх чахчылар» кинигэтин сүрэхтэниитэ буолла. Бу кинигэҕэ Саха сирин сайдыытыгар сүҥкэн кылааттарын киллэрбит улуу дьоммут олохторуттан 23 кэрэхсэбиллээх устуоруйаны түмэн, норуокка-сэргэҕэ дьоһуннаах бэлэҕи оҥордо. «Көлүөнэ ситимэ» сугулаан норуот педагогиката ааспыт кэм эрэ үгэһэ буолбакка, билиҥҥи кэмҥэ улахан суолталаах, олоххо туһалаах ньыма буоларын бигэргэттэ. Үөрэх тэрилтэлэрэ, нэhилиэк, уопсастыбаннай түмсүүлэр уонна төрөппүттэр сомоҕолоһуулара, Дьоруойдуу быһыы холобура уонна төрүт култуураны үйэтитэр кинигэлэр тахсыылара — бу барыта оҕону сиэрдээх, төрөөбүт дойдутун таптыыр, бигэ тирэхтээх киһи гына иитэн таһаарарга туһуланар. Бу курдук тэрээһиннэр көлүөнэлэр ситимнэрин бөҕөргөтөн, норуот духуобунай баайа чөл хааларын хааччыйаллар.
Канал в каталоге Максиметера
502 подписчиков · Госорганы и учреждения