Эйгэ — 12 августа 2026 г. в 01:19:14.163
Эйгэ Ийээ, аҕаа... Искраҕа «Мэхээлэчээн булчут» диэн быйыл көстүбүт киинэ сүрүн герой оруолун Мишугу оонньообут Дамир Дьяконов эбэтин кытары билистибит. Антонина Григорьевна Никифорова нэһилиэгэр бэтэринээрдиир. Ынах Өлбүт диэн сайылыкка олорор, сиэнэ быйыл номнуо төрдүс кылааһы ситиһиилээхтик бүтэрэн гимназияҕа, Намҥа, киирэр. Ону тэҥэ Иннокентий Васильевиһы уонна Марианна Николаевна Харитоновтардыын нэһилиэк олоҕун-дьаһаҕын туһунан кэпсэттибит. Дэриэбинэ сүрүн кыһалҕата диэн – уу боппуруоһа. Ыраас ууну урбаанньыттар Намтан таһаллар эбит. Нэһилиэк уу массыыната 11,5 км тэйиччи сытар Кэҥкэмэ үрэхтэн таһар. Күөллэр уулара сайын уолар. Кыһын сүөһүлэрин уу таһан оҥоһуу хоруудаҕа уулаталлар. Билигин дьаһалта скважинаны быһаарса сылдьар. Баһылык Андрей Григорьевич Новгородов этэринэн, промыленность министерствотын кытта сатаан докумуон өттүн кыайдахха, водопроводка да, уу да иһэргэ нэһилиэк хааччыллыа этэ. Бу боппуруос өссө Сэбиэскэй саҕаттан көтөҕүллүбүт боппуруос. Төһө үп көрүллэриттэн, улуус да өттүттэн, республика да буоллун, федеральнай даҕаны бырагырааммаларга кыттан бөх свалкатын, хоруу хастардыбыт диэн олохтоохтор кэпсииллэр. Искраттан сайылыкка барар суолу сырдатыы үлэтэ түмүктэнэн ааспыт өрөбүл «тестовай» холбонуу ыытыллыбыт. Уһуйаан тутуутун үлэтэ бара турар. Суолу кыралаан өрөмүөннүүллэр – 2024 с. 4,5 мөл. сууммаҕа ямочнай үлэтэ барбыт, быйыл 3 мөлүйүөҥҥэ 18 туочуканы оҥорон биэрбиттэр. Ыаллыы сытар Дьяконовтары Харитоновтар хайҕыы саҥараллар: «Олус үлэһит ыалынан таһынан, 21 ыанар ынахтахтаахтар, оҕолоро төрөппүттэрин ийээ, аҕаа диэн ыҥыраллар. Истэргэ соһуччу эрээри, олус үчүгэй дии, уу сахалыы эйгэ. Билиҥҥи кэмҥэ тылларын бэркэ билэллэр, туһаналлар», – диир Иннокентий Васильевич. #биирсомоҕо #кыһамньы #үтүөтүмүк «Макс»-каналга суруттар 👍