Кулун тутар 20 күнүгэр Н.И. Бойлохов аатынан Үөһээ Бүлүүтээҕи оҕо ускуустуба оскуолатыг... — 21 марта 2026 г. в 04:02:31.354
Кулун тутар 20 күнүгэр Н.И. Бойлохов аатынан Үөһээ Бүлүүтээҕи оҕо ускуустуба оскуолатыгар скульптураҕа өрөспүүбүлүкэтээҕи олимпиада түмүктэннэ. Бу олимпиада уонна идэтийии кууруһа Саха Өрөспүүбүлүкэтигэр Култуура сылын, Үөһээ Бүлүү улууһугар Үөрэх сылын чэрчитинэн ыытылыннылар. Олимпиада скульптор-косторез, Аҕа дойду Улуу сэриитин кыттыылааҕа, «Хотун Бүлүү» скульптура ааптардарыттан биирдэстэрэ А.Г. Прокопьев сырдык аатыгар ананна. Сүрүн тиэмэтэ – «Саха сирин биллиилээх худуоһунньуктарын уруһуйдара скульптураҕа». Скульптурнай пластилинтан оҥоһуктары күрэхтэһии икки көрүҥнээх буолла: очнай уонна заочнай. Үлэлэри көрүүгэ дьүүллүүр сүбэ састаабыгар үөһээ Бүлүү улууһуттан төрүттээх биллиилээх скульптордар ыҥырыллыбыттара: – Николай Никитич Чоччасов – скульптор, Арассыыйа худуоһунньуктарын холбоһугун чилиэнэ, Саха Өрөспүүбүлүкэтин култууратын үтүөлээх үлэһитэ, Үөһээ Бүлүү улууһун бочуоттаах гражданина; Нюргустана Владимировна Филиппова, худуоһунньук-скульптор, Саха Өрөспүүбүлүкэтин култууратын үтүөлээх үлэһитэ, П.П. Романов аатынан Саха художественнай училищетын преподавателэ. Ону тэҥэ «Искусство эйгэтигэр профессиональнай стандарты туһаныы» диэн 16 чаастаах идэтийии кууруһа ыытылынна. Үөрэххэ изо, ДШИ учууталлара, творческай куруһуок салайааччылара, эбии үөрэх уонна оскуолаҕа диэри саастаах оҕолор учууталлара кытыннылар. Олимпиада түмүктэринэн очнай уонна заочнай көрүҥнэргэ кыайыылаахтар ааттаннылар. Бэлиэ түгэнинэн буолла – улахан группаҕа икки кыайыылаахха Үөһээ Бүлүүттэн Айаан Федоров (Гран-При) уонна Ньурбаттан Васильева Сандаара (Лауреат 1 ст.) П.П.Романов аатынан Саха художественнай училищетыгар үөрэххэ киирбиттэрин туоһулуур сертификат туттарылынна. Бу сертификаттар оскуола үөрэнээччилэрин үрдүк таһымнаах бэлэмнээхтэрин уонна учууталлар уһуйууларын билинии буолар. Скульптураҕа үөрэх үгэстэрэ утумнаан иһэллэрин көрдөрөр суолталаах түгэн. Кыайыылаахтары, призердары уонна кинилэри бэлэмнээбит учууталлары, кыттыылаахтары барыларын эҕэрдэлиибит! Экспертэргэ сүбэ-ама өттүнэн көмөлөрүн иһин махталбытын тириэрдэбит. Бириистэргэ спонсордаабыт Анисим Анисимович Прокопьевка уонна кини дьиэ кэргэнигэр урдук махталбытын этэбит. Скульптура ускуустубатын сайыннарар, үгэстэри харыстыыр үлэҕэ барыгытыгар ситиһиилэри баҕарабыт! @uoheebuluu