📙📚📙📚📙📚📙📚📙📚 — 25 июня 2026 г. в 03:25:12.721
📙📚📙📚📙📚📙📚📙📚 🔸"Үөһээ Бүлүү" Үрүҥ Тунах Уйгулаах Ыһыахпыт иккис күнүгэр сарсыарда 11 чаастан Түгэхтэй дьоллоох туонатыгар Моҕол ураһаҕа Үөһээ Бүлүү аатын өрө туппут, төрөөбүт дойдуларын олоҕор – дьаһаҕар симэлийбэт суолларын – иистэрин хаалларбыт, үлэһит, үтүө дьоммут тустарынан кэпсиир “Үөһээ Бүлүү өҥ буоруттан” кинигэ 4-с таһаарыытын биһирэмэ элбэх киһи кыттыылаах, кэрэхсэбиллээх тэрээһин буолла. 🔸Кинигэни хомуйан оҥордулар редколлегия салайааччыта Н.Ф. Гурьева, Үөһээ Бүлүү улууһун МТ дьаһалтатын Суоттуур-учеттуур палата бэрэссэдээтэлэ, Л.Л. Петрова, улуус дьаһалтатын сүрүннүүр исписэлииһэ, Г.А. Егорова, О.Д. Федорова аатынан киин модельнай библиотека кыраайы үөрэтэр отдел салайааччыта. 🔸Кинигэ биһирэмин СӨ Норуотун хаһаайыстыбатын үтүөлээх үлэһитэ, улуустааҕы бэтэрээннэр сэбиэттэрин бэрэссэдээтэлэ И.Е. Чычахов иилээн – саҕалаан ыытта. Тэрээһиҥҥэ ыраахтан, чугастан кинигэҕэ киирбит дьон оҕолоро, сиэннэрэ, чугас дьонноро уонна улуус олохтоохторо кэлэн долгуйа ахтан - санаан аастылар. 🔸Улуус историятын үйэтитиигэ үлэлии – хамсыы сылдьар дьоҥҥо барҕа махталларын эттилэр. 🔸Кинигэ биһирэмин силбиһиннэрэ “Килбиэннээх суолунан” ааспыт кэмнэри кэпсиир кинигэ уонна үлэлээн ааспыт үтүө дьоммут сырдык мөссүөннэрин кэрэһэлиир хаартыска быыстапката турда. Улуус историятын көрдөрөр кинигэ атыыта тэрилиннэ. 🔸Улууска уонна өрөспүүбүлүкэҕэ биллэр бөдөҥ сэбиэскэй уонна партийнай салайааччыларбыт уонна араас идэлээх исписэлиистэр улууспут киэн туттуута буолаллар. Кинилэр ураты баай ис хоһоонноох олохторо, дьаныардаах үлэлэрэ – хамнастара, ситиспит ситиһиилэрэ үүнэр кэнчээри ыччаттарбытыгар, үйэлэр тухары инникигэ – кэрэҕэ угуйа ыҥыра, холобур буола туруохтара.