Сүдү Олоҥхоһут Андрей Титович Титаров айымньыта саҥа тыыннаах кэлэр көлүөнэҕэ тиийдэ.
Сүдү Олоҥхоһут Андрей Титович Титаров айымньыта саҥа тыыннаах кэлэр көлүөнэҕэ тиийдэ. 📚📙📚📙📚📙📚📙📚📙 Бэс ыйын 24 күнүгэр, Үрүҥ Тунах Ыһыах түһүлгэтигэр, улуустааҕы О.Д.Федорова аатынан киин модельнай библиотека Саха сирин култууратын историятыгар умнуллубат кэрэ бэлиэ түгэни бэлэхтээтэ. Ол курдук, олоҥхоһут, оһуохайдьыт, бөлүһүөк Андрей Титович Титаров «Хардааччы Бэргэн» сүдү айымньыта саҥа тыын ылан, кэлэр кэскилбитигэр ананан, оҕолорго аналлаах кинигэ буолан, күн сирин көрдө. Бу үөрүүлээх түгэн олоҥхону тарҕатыыга, сахалыы тыыннаах көлүөнэни иитиигэ улахан суолталаах. Бу улуу дьыаланы бэйэтин сүрэҕин-быарын нөҥүө иҥэрэн, оҕо өйүгэр-санаатыгар сөп түбэһиннэрэн, алмаас курдук кырыылаан таһаарда Саха Өрөспүүбүлүкэтин култууратын үтүөлээх үлэһитэ, Үөһээ Бүлүү улууһун култуура департаменын уонна духуобунай сайдыы муниципальнай казеннай тэрилтэ салайааччыта, Үөһээ Бүлүү улууһун уонна Кэнтик нэһилиэгин бочуоттаах олохтооҕо, Арассыыйа бастыҥ эбии үөрэхтээһинин учуутала Айталина Михайловна Мойтохонова – Сахаайта. Кини сыралаах үлэтин түмүгэр Олоҥхо сахалыы тыла, дьоруойдуу уобараһа, үтүө үөрэҕэ кырачаан ааҕааччыга тиийимтиэ, өйдөнүмтүө гына сурулунна. Кинигэ сүрэхтэниитин тэрээһинигэр Андрей Титович Титаров сиэн уола Андрей Александрович, кини олоҕун аргыһа Роза Семеновна уонна Үөһээ Бүлүү улууһун баһылыгын бастакы солбуйааччыта Егор Дмитриевич Иванов, Хомустаах нэһилиэгин Аҕа баһылыга Яков Викторович Семенов уонна биир санаалаах дьон, учууталлар, төрөппүттэр кыттыыны ыллылар. Сүрэхтэнии түһүлгэтигэр истиҥ кэпсэтии ыытылынна, олоҥхону туһанан оҕону иитиигэ, кинигэ аҕалар саҥа кыахтарыгар санаалар этилиннилэр. Истиҥ көрсүһүүнү «Айар чөмчүүк» фольклорнай ансамбыл оҕолоро «Хардааччы Бэргэн» олоҥхотун ааҕан өссө дириҥ ис хоһоонноох оҥордулар. Маны тэҥэ олоӈхоһут, оһуохайдьыт, уһуйааччы, Үөһээ Бүлүү эдэр кэскиллээх ыччата, Самара куорат "Победа" култуура киинин специалиһа Хаар Захаровна Семенова дьоро күӈӈэ кэлбит ыалдьыттары эҕэрдэлээтэ. Мустубут дьон Андрей Титович үлэтин үйэтитиигэ тахсыбыт саҥа кинигэни олус сэргээтилэр, чугас дьоно эһэлэрин сырдык аатын ааттаан, айымньытын кэлэр көлүөнэҕэ тиэрдиигэ дьулуһалларын тоһоҕолоон бэлиэтээтилэр. Айталина Михайловнаҕа уонна бу улуу дьыалаҕа көмөлөспүт дьоҥҥо-сэргэҕэ барҕа махтал этилиннэ. «Хардааччы Бэргэн» кинигэ тахсыыта бу саха омук култууратын сайдыытыгар, олоҥхону кэлэр көлүөнэҕэ тиэрдиигэ улахан суолталаах бэлиэ түгэн. Бу кинигэ кырачаан ааҕааччыларга дьоруойдуу тыыннаах олоҥхо эйгэтин арыйыаҕа, төрүт тылбыт баайын-дуолун, өбүгэлэрбит үтүө үгэстэрин билиһиннэриэҕэ.