🔊 Хүндүлүг малчыннар болгаш чаңгыс чер чурттугларывыс! — 23 июля 2026 г. в 01:27:09.705
🔊 Хүндүлүг малчыннар болгаш чаңгыс чер чурттугларывыс! Улуг Наадым-биле силер бүгүдеге Тыва Республиканың Дээди Хуралының (парламентизиниң) өмүнээзинден изиг байыр чедирерин чөпшээреп көрүңер! Наадым дээрге анаа-ла байырлал эвес, а мал ажылдыг улуска хүндүткелдиң демдээ-дир. Малчыннар буянныг ажыл-иштиң бодаракчылары. Наадым – тыва кижиниң ёзу-чаңчылдарында болгаш культуразында быжыг сиңниккен байырлал. Мал ажылдыг улузувус тыва амыдыралдың бурунгу хевирин бөгүнге чедир кадагалап арттырбышаан, республиканың амгы сайзыралынга улуг рольду ойнап турар. Силерниң могаг-шылаг чок ажыл-ишчи холдарыңар – чемгерекчилеривис! Силерниң мал-маганга бердинген чүректериңер – бистиң тодуг-догаа амыдыралывыстың магадылалы! Бо чылгы Наадымны республиканың чону улуг көдүрлүүшкүннүг уткуп турар. Ону малчыннарывыс-биле кады байырлаарывыс чаңчыл апарган. Мал ажыл-агыйы – республиканың экономиказының кол адыры, үндезини болуп артпышаан. Тыва Республиканың эрге-чагырга органнары мал ажылын хөгжүдер дээш хүн бүрүде ажылдап, мал азырап азы ону өстүрер сорулгалыг өг-бүлелерни доктаамал деткип турар. «Агроүлетпүр комплекизиниң продукциязын үндүр садары» регионалдыг төлевилел биле «Тываның сүдү» губернатор төлевилел чоннуң улуг деткимчезин болгаш үнелелин алган. Мал ажылын хөгжүдеринге улуг идигни берген регионалдыг төлевилелдер боттандырылгазы чазак-чагырга черлериниң деткимчези-биле моон-даа соңгаар уламчылаар. Ындыг болганда, ол биске чүгле харыысалганы онаап турар эвес, а кызымак ажылга бедик хей-аъттыг болурувусче база кыйгырып турар. Наадым таварыштыр силер бүгүдеге кадыкшылды, аас-кежикти болгаш бүгү-ле ажылдарыңарга чедиишкиннерни күзедим! Чеди чүзүн малывыс сол-менди бооп, өзүп-мандып турзун! Одар черлеривис оът-көк-биле чалгыыр болзун! Курай-курай!