Куйаар ситиминэн Кытайга: И. Барахов аатынан Үөһээ Бүлүүтээҕи 1 №-дээх оскуола саҥа быр...
Куйаар ситиминэн Кытайга: И. Барахов аатынан Үөһээ Бүлүүтээҕи 1 №-дээх оскуола саҥа бырайыага. Билиҥҥи кэмҥэ үөрэх эйгэтигэр саҥа ньымалар, саҥа хайысхалар күннэтэ киирэ тураллар. Оскуолалар оҕолор кэскиллэрин өйдөөн, аан дойдуга инники күөҥҥэ тахсар идэлэри баһылыылларыгар усулуобуйа тэрийэргэ дьулуһаллар. Ол курдук, Үөһээ Бүлүү улууһун үөрэхтээһинин биир бастыҥ тэрилтэтэ, И. Барахов аатынан 1 №-дээх орто оскуола, быйылгы үөрэх дьылыгар олус интэриэһинэй уонна кэскиллээх бырайыагы саҕалаата. Бу үөрэх дьылыгар оскуолаҕа үс бэһис кылаас арыллан үлэлиир. Ол иһигэр, 5 "В" кылаас гуманитарнай хайысхалаах, ол аата, манна оҕолор тылга, историяҕа, култуураҕа дириҥник үөрэнэллэр. Кылаас салайааччытынан омук тылын учуутала Елизавета Иннокентьевна Яковлева ананан үлэлии сылдьар. Оскуола салалтата уонна төрөппүттэр сүбэлэринэн, оҕолор саҥа аан дойду тылын баһылыылларыгар үчүгэй усулуобуйа үөскээтэ. Ол курдук, быйыл бу кылаас оҕолоругар Кытай тыла диэн саҥа предмет киирдэ. Бу өссө биир дойду тылын үөрэтии буолбакка, кэскили түстүүр, аан дойду ситиминэн барсар улахан хардыы буолар. Куйаар ситиминэн кэлбит ыраах дойду учуутала Дьэ, бу предмети ким үөрэтэрий диэн ыйытыы үөскүөн сөп. Оскуола саҥа технологиялары уонна тэхиниичэскэй сайдыыны туһанан, оҕолорго дьиҥнээх Кытай тылын төрүт тыллаах учуутала үөрэтэригэр усулуобуйа тэрилиннэ. Кытайтан бэйэтиттэн, Лян Илань диэн олус эдэр уонна кэскиллээх учуутал куйаар ситиминэн үөрэтэр. Бу ураты ньыма, географическай ырааҕы суох оҥорон, оҕолорго дьиҥнээх Кытай тылын уонна култууратын тыынын биэрэр. Дьиҥинэн, иккис омук тылын үөрэтии, ордук атын суруктаах-бичиктээх тылы, улахан эрэйи үөскэтиэн сөп. Ол эрээри, Илань оҕолору кытта түргэнник биир тылы булан, үөрэх процеһын олус интэриэһинэйдик ыытар. Ону таһынан кылаас салайааччыта тьютор быһыытынан ананан дьарыктарга булгуччу баар буолар, оҕолор сатаабатахтарын, өйдөөбөтөхтөрүн тутатына быһааран биэрэр. Нэдиэлэҕэ иккитэ буолар дьарыктар оҕолорго саҥа эйгэни арыйаллар. Билигин оҕолор бастакы хардыыларын оҥорон эрэллэр. Кинилэр дьоҕурдарын уонна интэриэстэрин бэлиэтээн туран, быйылгы үөрэх кэмигэр дорооболоһору, бэйэни билиһиннэриини, уонна саамай сүрүнэ, төрөппүккэ тапталы этэргэ үөрэннилэр. "Ийэбин мин таптыыбын", "Аҕабын мин таптыыбын" диэн тыллар Кытай тылынан иһиллэллэр. Бу, кырдьык, оҕолор үтүө иэйиилэрин, төрөппүттэргэ ытыктабылын чиҥэтэр. Саҥа платформалар уонна кинилэр суолталара Билиҥҥи кэмҥэ ханнык баҕарар үөрэх эйгэтигэр техническэй сайдыыны туһанара ирдэнэр. Ол курдук, дьиэҕэ үлэни толоруу анал платформаҕа буолар. Ити платформа оҕолорго бэйэлэрин дьарыктарын кэмигэр толорор, учууталга түргэнник ыытар, уонна учууталтан оперативнай эппиэти ылар кыаҕы биэрэр. Бу платформалар үөрэтии процеһын саҥа таһымҥа таһаараллар, оҕолор бэйэлэрин үөрэхтэригэр эппиэтинэстэрин үрдэтэллэр. Оскуола билиҥҥи кэмҥэ Дьокуускай куоракка үлэлиир «Панда скул» онлайн оскуоланы кытта дуогабар түһэрсибитэ. Ол онлайн оскуола учууталларыттан биирдэстэрэ Илань буолар. Бу курдук тэрилтэлэри кытта ситимнэһии, оскуолаҕа кэлэр кэскиллээх предметтэри, саҥа хайысхалары киллэрэргэ улахан көмө буолар. Оҕолор санаалара уонна инники кэскил Оҕолорбут Кытай тылын үөрэтииттэн олус астыналларын, интэриэһиргээн туран дьарыктаналларын бэлиэтииллэр. Билиҥҥи оҕолор - кэскиллээх, сайдыыга дьулуһар, глобальнай олоххо бэлэм буолуохтаахтар. Ол иһин, Кытай тылын үөрэтии кинилэргэ аан дойду ырыынагар үлэҕэ, үрдүк үөрэххэ киириигэ, эбэтэр атын култууралары кытта билсиһиигэ улахан көмө буолуон сөп. Оскуола салалтатын улахан былаана - инникитин оҕолор Кытайга баран кэлиэхтээхтэр. Бу бырайыак оҕолорго тылы көннөрү үөрэтии буолбакка, дьиҥнээх култуураҕа, олоххо-дьаһахха чугаһыыр, ону бэйэ хараҕынан көрөр кыаҕы биэриэҕэ. Оннук айан оҕолорго умнуллубат буолуоҕа, олохторугар улахан сабыдыалы оҥоруоҕа. Тыл баар сиригэр барар, ол тылынан кэпсэтэр, олохтоох дьону кытта алтыһар - бу ханнык баҕарар тылы үөрэтиигэ саамай туһалаах хайысха. Түмүк тыл