Маҥнайгы кылаас үөрэнээччилэрин "Үөрэнээччи буоллубут" диэн эҕэрдэ тэрээһиннэрин уонна ...
Маҥнайгы кылаас үөрэнээччилэрин "Үөрэнээччи буоллубут" диэн эҕэрдэ тэрээһиннэрин уонна аһаҕас уруоктарын туһунан Бастакы чиэппэр түмүктэниэн иннинэ, икки күн устата, оскуолабытыгар үгэскэ кубулуйбут маҥнайгы кылаас оҕолоругар анаммыт "Үөрэнээччи буоллубут" диэн үөрүүлээх эҕэрдэ тэрээһин уонна аһаҕас уруоктар үрдүк таһымнаахтык буолан аастылар🙌 Бу кэрэ бэлиэ күҥҥэ маҥнайгы кылаас үөрэнээччилэригэр анаан чахчы бырааһынньык дьиэрэйдэ! Оҕолорго үөрэнээччи буолбуттарын бигэргэтэр бэлиэнэн "Үөрэнээччи буоллубут" диэн түмүгү таһаарар мэдээл уонна туоһу сурук туттардыбыт. Бу түгэн оҕолор сүрэхтэригэр олус улахан үөрүүнү, киэн туттууну аҕалла🙌 Тэрээһини оскуолабыт директоры иитэр үлэҕэ солбуйааччыта, ытыктабыллаах Тихонова Любомира Александровна истиҥ эҕэрдэ тылы этэн арыйда. Кини оҕолорго үтүө тылын анаата, инники олохторугар ситиһиилэри баҕарда. Маҥнайгы кылаастар бэйэлэрэ бэлэмнэммит сорудахтарын кэрэхсэбиллээхтик көрдөрдүлэр. Үөрэнээччи буолбут андаҕар тылларын тобулу туттан, сүрэхтэриттэн истээччилэргэ тириэртилэр. Ыллаан-туойан, бэлэмнээбит дьиэҕэ үлэлэрин көрдөрөн, барыбытын үөрдэн-көтүтэн, оҕо саас ыраас дууһатын арыйдылар. Үөрүүлээх түгэн кэннэ, оҕолор кылаастарыгар төрөппүттэрин, иитээччилэрин ыҥыран, маҥнайгы чиэппири түмүктүүр олус үчүгэй аһаҕас уруоктары ыыттылар. Кылаас салайааччылара бу уруоктарга олус үчүгэйдик бэлэмнэммиттэрэ көһүннэ, оҕолор ситиһиилэрин киэн тутта көрдөрдүлэр. Оҕолорун үөрүүлэрин үллэстэ, 1 "А" кылаас төрөппүттэрэ оҕолоругар эҕэрдэ тылынан, сэмэй бэлэхтэринэн күндүлээтилэр. Ону таһынан, бэйэлэрин сатабылларын көрдөрөн олус үчүгэй мастер-кылаастары ыыттылар🌟 1 "Б" кылаас төрөппүттэрэ оҕолоругар маҥнайгы кинигэлэрин бэлэхтээтилэр, билии аартыгар бастакы хардыыны оҥороллорун бэлиэтээтилэр. Оҕолору уһуйааны түмүктэппит иитээччилэрэ кэлэн күндү ыалдьыт буолан, оҕолорго кэс тылларын эттилэр уонна сэмэй бэлэхтэри туттартаатылар🌸 Бастакы чиэппэр устата тугу үөрэппиттэрин көрдөрбүт оҕолорунан ыалдьыттар олус сөхтүлэр, махтаннылар. Хас биирдии оҕо билиигэ, сайдыыга дьулуура барыбытыгар сырдык эрэли саҕар. Бары маҥнайгы кылаас оҕолоругар үөрэхтэригэр үрдүк ситиһиилэри, билиигэ тардыһыыны, дьоллоох оҕо сааһы баҕарабыт! Бу кэрэ күҥҥэ кэлэн биһигини үөрдүбүт ыалдьыттарга барҕа махталбытын тиэрдэбит. Бу тэрээһини бэлэмнээн ыыппыт учууталларга өссө үгүс ситиһиилэри баҕарабыт!