Ытыктабыллаах биир дойдулаахтарым! Күндү Саха сирин олохтоохторо! — 22 августа 2026 г. в 06:44:31.491
Ытыктабыллаах биир дойдулаахтарым! Күндү Саха сирин олохтоохторо! Бүгүн, атырдьах ыйын 22 күнүгэр, дойдубутугар Россия Судаарыстыбаннай былааҕын күнүн бэлиэтиибит. Биһиги триколорбут Калининградтан саҕалаан Чукоткаҕа диэри киэҥ нэлэмэн Ийэ дойдубутун бүтүннүү түмэр, ол иһигэр биһиги Сахабыт сирин үрдүнэн эмиэ долгуйа тэлимниир. Мин киэн тутта этэбин: былаахпыт үрүҥ өҥөр мин көрөбүн биһиги хаардаах киэҥ кэйээрдэрбитин, күөх өҥҥө – Улуу Өлүөнэ эбэбитин, көҥүл күөннээх үрдүк мэҥэ халлааммытын, кыһыл өҥҥө – үйэлэр тухары өстөөхтөн Аҕа дойдутун көмүскээбит, тымырбытынан устар өбүгэбит кыһыл хаанын. Биһиги, Саха сирин олохтоохторо, аҥаардас Россия сорҕото эрэ буолбатахпыт. Биһиги кини хотугу кыраайга тирэнэр тирэҕэ, форпоһа буолабыт. Оттон Россия биһиэхэ сайдар, төрүт культурабытын, үгэспитин харыстыыр уонна иннибит диэки эрэллээхтик салгыы айанныыр кыаҕы биэрэр модун державабыт. Биһиги бэйэ-бэйэтэ суох сатаммаппыт. Саха сирэ күүстээх буоллаҕына – дойдубут эмиэ күүстээх. Оттон Россия ньыгыл түмсүүлээх буоллаҕына – Сахабыт сирэ сайдар. Онно ураты оруолу “Биир ньыгыл Россия” партия оонньуур. Билэбин, ким эрэ ылыммат, атыны талар. Ол – кини бырааба. Ол эрээри, баары баарынан эттэххэ... Кини көмөтүнэн өрөспүүбүлүкэбитигэр оскуолалар, балыыһалар тутуллаллар, суол-иис, транспорт инфраструктурата сайдар. “Биир ньыгыл Россия” хас биирдии бөһүөлэк интэриэһиттэн саҕалаан бүтүн дойдубут сыалын-соругун биир идиэйэ тула түмэр, сүрүннээн, иилээн-саҕалаан сайдыыны тэрийэр. Кини инники кирбиигэ биһиги байыастарбытыгар, тыылга кинилэр дьиэ кэргэннэригэр көмөлөһөр, омугу омук дэтэр үгэстэрбитин хараанныыр. Биһиги биир, түмсүүлээх, оттон норуоппут сомоҕолоох буоллаҕына, булгуруйбат, туохха да бэриммэт модун күүстээх буоларбытын история чахчылара кэрэһэлиир. Барыбыт сүрэхпит бааһа – биир, барыбыт киэн туттуута – биир, барыбыт дьылҕата – эмиэ биир! Ону ким да самнарыах туһа суох! Үс өҥнөөх былаахпыт мэлдьитин да төрөөбүт дойдубутугар тапталбыт, бэриниилээх буолуубут уонна күүспүт бэлиэтэ буола турдун. Туругурдун Сахабыт сирэ, туругурдун Модун Россия!