Ааспыт өрөбүллэргэ, Горнай улууһун киинигэр Бэрдьигэстээххэ, СӨ култууратын туйгуна, Со... — 6 апреля 2026 г. в 15:21:39.018
Ааспыт өрөбүллэргэ, Горнай улууһун киинигэр Бэрдьигэстээххэ, СӨ култууратын туйгуна, Солоҕон нэһилиэгин бочуоттаах олохтооҕо, үөрэхпит кыһатын 1990 сыллаах выпускнига Игорь Иванович Иванов сырдык кэриэһигэр анаммыт «Көрү-нары оройуттан тутан» аһаҕас Өрөспүүбүлүкэтээҕи күөн-күрэс ыытылынна. Көрүү күрэххэ 9 улуустан, Дьокуускай куораттан кэпсэтии уонна оригинальнай жанр көрүҥнэригэр биирдиилээн уонна бөлөҕүнэн кыайар иһин үгүс кыттааччы күрэстэстэ. Ыраах улуустартан Эдьигээнтэн, Дьааҥыттан тиийэ кэлэн кыттыыны ыллылар. Дьүүллүүр сүбэ уопсайа 60 нүөмэри көрөн, 23 номинацияҕа бастыҥнары быһаарда. Муҥутуур кыайыылаахтарынан, Уус-Алдан улууһун Бороҕон нэһилиэгиттэн, «Бэрт бэтиэхэлэр» бөлөх буоллулар. Биһиги үөрэхпит кыһатын СКД-25 салаатын устудьуоннара бөлөҕүнэн көрүүгэ «Бастыҥ күргүөмүнэн кыттыы» анал ааты ылан, Солоҕон нэһилиэгин олохтоохторо туруорбут харчынан бириэмийэлэринэн наҕараадаланнылар. Биир дойдулаахтарым, М.Р. Цыпандин салайааччылаах Тараттааҕы култуура уонна спорт киинин үлэһиттэрин «Дьаралык» бөлөҕө Солоҕон нэһилиэгин дьаһалтата туруорбут анал бирииһин хаһаайыттарынан буоллулар. Выпускникпыт кэриэһигэр ыытыллыбыт күрэххэ анаан үөрэхпит кыһата туруорбут бирииһин кыайыылаахтарынан, Солоҕон нэһилиэгиттэн, Татьяна Корякина («Бастыҥ монолог ааҕааччы») уонна Ньурба улууһун Чуукаар нэһилиэгиттэн, Ульяна Иванова («Кэскиллээх монолог») ааттаннылар. Күрэх муҥутуур кыайыылаахтарын, анал аат хаһаайыттарын тэрээһиҥҥэ кэлэн ситиһиилээхтик кыттыбыккытынан ис сүрэхпиттэн эҕэрдэлиибин! Инникитин да маннык хабааннаах тэрээһиннэргэ көхтөөхтүк кытта туруҥ, талааҥҥытын арыйа, дьоҕургутун сайыннара сылдьыҥ!