Мах адӕм иннӕты хуызӕн не сты. Мах лӕгдзинадӕй ӕмӕ иугай лӕгты сгуыхтдзинӕдтӕй ӕгас дун... — 21 августа 2026 г. в 18:42:10.474
Мах адӕм иннӕты хуызӕн не сты. Мах лӕгдзинадӕй ӕмӕ иугай лӕгты сгуыхтдзинӕдтӕй ӕгас дунейы дӕр ничи амбулдзӕн. Фӕлӕ иннӕтӕ ӕмбырдӕй ӕнцонӕй цы хуымӕтӕг фарстатӕ алыг кӕнынц, уыдоныл махӕн нӕ бон нӕ цӕуы. Ӕртӕ лӕгмӕ нӕм цыппар хицӕн зондахасты разыны, кӕрӕдзиуыл нӕ фӕбадынц. Ӕз фӕлвӕрдтон ӕрӕмбырд кӕнын, къалиндартӕ чи аразы, уыдоны. Ӕрбацыдысты, фӕлӕ кӕрӕдзиимӕ не сразы сты, ӕмӕ хъуыддаг не срӕзыд. Фарста йӕхӕдӕг хуымӕтӕг нӕу. Нӕ фыдӕлтӕм сӕдӕ азы размӕ дӕр ма хӕхбӕсты ныры къӕлиндартӕ нӕ уыдис, кӕсын, фыссын нӕ зыдтой, бонтӕ нымӕцонтӕй нӕ нымадтой, чырыстон ӕмӕ паддзахадон бӕрӕгбӕттыл сӕ цард нӕ бастой. Хуры ӕмӕ мӕйы цыдмӕ кастысты, куысты афонтӕ зыдтой. Иу бӕрӕгбонӕй иннӕмӕ нымадтой рӕстӕг къуыригай. Уыцы нымад хъуамӕ райдайа Цыппурс ӕмӕ Ногбонӕй. Цыппурс Чырыстийы райгуырӕн бон нӕу (7.01), фӕлӕ цыппар урсы къуырийы кӕроны бӕрӕгбон. Вӕййы афӕдзы кӕрон, хурхӕтӕны хӕдфӕстӕ Цыппӕрӕмы. Декабыр дӕр Цыппурсы мӕй уымӕн хуины. Кӕд йӕ фӕстӕ къуыри мӕй сног уа, уӕд Цыппӕрӕмы вӕййы Ногбон. Кӕд нӕма сног уа, уӕд та иннӕ Цыппӕрӕмы. Уырдыгӕй цӕуы бӕрӕгбӕтты нымад, Ног Азӕй нӕ. Нӕй бӕрӕгбӕттӕ бӕттӕн нӕдӕр къалиндарон бонтыл, нӕдӕр чырыстон бӕрӕгбӕттыл. Уӕд сӕ раст нымад ӕмӕ мидисӕй цух кӕнынц. Уыцы рӕдыд кӕнынц бирӕтӕ. Афтӕ чи зӕгьа, кӕнӕ ныффысса "бӕрӕгбон сентябыры ӕртыккаг Цыппӕрӕмы вӕййы", уымӕ дарддӕр хъусгӕ нал у. Уымӕн ӕмӕ ахӕмӕй байрох вӕййы, йӕ фыдыфыд нӕдӕр Григориан, нӕдӕр Юлиан къалиндарӕ зыдта, йӕ бӕрӕгбӕттӕта ирон нымадӕй нысан кодта. Иутӕ фӕзӕгьынц "Махмӕ Хетӕджы бон кӕддӕриддӕр кодтой июлы дыккаг Хуыцаубоны." Иннӕтӕ не сразы вӕййынц, фыццаг Хуыцаубоныл ныллӕууынц. Ӕцӕгдзинад та нӕдӕр иуы ис, нӕдӕр иннӕйы. Хетӕджы Уастырджийы бон вӕййы Уациллайы бӕрӕгбонӕй дыууӕ къуырийы фӕстӕдӕр, Кӕхцгӕнӕнӕй та иу къуыри раздӕр. Афтӕ нымайгӕ у алы бӕрӕгбон дӕр. Уый кӕй бон у, ахӕмтӕ тынг стӕм сты. Уымӕн вӕййынц, ӕрвылаз цы цалдӕр къалиндары рацӕуы, уыдон алыхуызон.