ХУДӔГЫЛ АХУДӔМ
ХУДӔГЫЛ АХУДӔМ 😂АДИХ СӔ КОДТАИККАМ Æхсæвы мæм хæдзармæ хуыснæг фæзынд. Æхца агуырдта. Райхъал дæн æмæ иумæ агурын райдыдтам. Куы ссарæм, уæд сæ дыууæ дихы акæндзыстæм, зæгъгæ, ныхасгондæй… 😂ФЫН ӔЦӔГМӔ НӔ ХИЗЫ? Ус райсомæй йæ лæгæн афтæ зæгъы: – Дысон-бонмæ мæ фыны уыдтон, цыма мын бриллиант цонгдарæн æмæ хъусцæджытæ балæвар кодтай. Æрттывдтытæ калдтой! Уымæн цы нысан уа? – Лæг æй ахъæбыс кодта æмæ йæм дзуры: – Изæры йæ бамбардзынæ. Ус ницæуыл бацауæрста – диссаджы фынг ныккалдта, зынаргъ сæны авг байгом кодта, уат мыдадзын цырæгътæй саив. Лæг æрбацыд, æмæ йæм рæсугъд къопп дæтты. Сылгоймаг æй цингæнгæ фегом кодта æмæ дзы федта… фынты нысаниуæг æмбарынгæнæн чиныг. 😂ЙӔХИ САБЫР ДАРЫ – Куыд у, цæй, дæ къупри лæг? Æхсæвыгæтты ма йе ‘хца казиноты æмæ ресторанты ныкъкъуывитт ласы? – Нæ. Йемæ бæстон аныхас кодтон æмæ тамако нал дымы, нал нуазы, ресторантæм нал цæуы. Сабырæй реанимацийы хуыссы. 😂ХӔРӔГӔН – ӔФСЫМӔР Астæуккаг Азийы автоинспекцийы кусæджы къухы æнæхъæн бон ницы бафтыд, æмæ мæстæй пихылæйттæ калдта. Кæсы, æмæ зæронд лæг хæрæгыл æрбацæуы. – Хорз лæг, æгæр тагъд цæуыс, ивар бафид. – Æгæр тагъд? Хæрæгыл?! – Æмæ ма йæ лæдзæгæй дæр ныццавтай! Цæрæгойтæм цæй æгъатыр дæ! Ныртæккæ дзы хатыр ракур! Зæронд лæг хæрæджы къухæй æрсæрфта æмæ йæм дзуры: – Бахатыр кæн, хæрæг, лæдзæгæй дæ кæй ныццавтон, уый тыххæй. Де ‘фсымæр автоинспекцийы кусы, уымæн цы зыдтон!