"СУНТААР СОНУННАРА" официальный МАХ канал редакции
Без категории · 13 апреля 2026 г.
Юрий Иванов: “Исписэлиистэр олорор дьиэлэрин туруорсабыт”
Юрий Иванов: “Исписэлиистэр олорор дьиэлэрин туруорсабыт” 🔹🔹Саха сиригэр “Биир ньыгыл Арассыыйа” норуот бырагырааматын иитинэн, доруобуйа харыстабылын салаатыгар биэс сыл иһигэр 68 биэлсэр-акушер уонна быраас амбулаториялары тутуллан киирбиттэрэ. Маны таһынан, 2023–2025 сылларга аныгы олох ирдэбилигэр эппиэттиир 3 поликлиника үлэҕэ киирэн, олохтоохтор абыраннылар. 🔹🔹Бүгүн Дьокуускай куоракка “Биир ньыгыл Арассыыйа” “Түмүк баар!” пуорумун чэрчитинэн, улуустан кэлбит дэлэгээссийэлэр үөрэх, доруобуйа харыстабылын эбийиэктэригэр сырыттылар. Сунтаар улууһун 26 нэһилиэгин баһылыктара быры кэлэн пуорумҥа кытта сылдьаллар. 🔹🔹Уустуйа баһылыга Юрий Иванов мэдиссиинэ аныгы технологиятынан сэбилэммит Онкологическай диспансерга сылдьыбытын туһунан кэпсээтэ: - Дойду Аҕа баһылыга көҕүлээбит “Доруобуйа харыстабыла” национальнай бырайыагынан тутуллубут саҥа Онкодиспансерга сырыттым. 21 үйэҕэ араак курдук уодаһыннаах ыарыынан ыалдьар дьон ахсааннара элбээтэ. Онон, Саха сирин олохтоохторо өрөспүүбүлүкэттэн тахсыбакка көмөнү ылар кыахтаннылар. Онкология киинэ үрдүк технологиялаах көмөнү оҥорор тэриллэринэн толору сэбилэммит эбит. Эбиэт кэнниттэн Уопсастыбаннай өйөбүл киинигэр «Здоровое будущее – преемственность поколений и семейные ценности» төгүрүк остуолга кытынным. Бу манна тыын суолталаах боппуруостары тула кэпсэттибит. Тыа сиригэр миэдик тиийбэт кыһалҕата сытыытык турар. Олорор дьиэ-уот суох буолан, исписэлиистэр үлэлии кэлбэттэр. Биһиги иккис сылын эдэр исписэлиистэргэ анаан олорор дьиэ туруорсабыт. Балыыһа тутуугар билигин федеральнай реестргэ киирэн турабыт, - диэн санаатын үллэһиннэ.