"СУНТААР СОНУННАРА" официальный МАХ канал редакции
Без категории · 13 апреля 2026 г.
Юрий Прокопьев: “Эдэр исписэлиистэри бары усулуобуйанан хааччыйарга дьулуһабыт”
Юрий Прокопьев: “Эдэр исписэлиистэри бары усулуобуйанан хааччыйарга дьулуһабыт” Дьокуускай куоракка «Биир ньыгыл Арассыыйа» «Түмүк баар!» эрэгийиэннээҕи отчуоттуур пуорумун чэрчитинэн, «Здоровое будущее – преемственность поколений и семейные ценности» төгүрүк остуол буолла. Мунньаҕы Өрөспүүбүлүкэтээҕи офтальмологическай клиническэй балыыһа кылаабынай бырааһа, норуот дьокутаата Иван Луцкан ыытта. Төгүрүк остуолга «Старшее поколение» федеральнай партийнай бырайыак координатора Александр Подголов, «Крепкая семья» федеральнай партийнай бырайыак координатора Афанасий Постников, нэһилиэк баһылыктара, уопсастыбанньыктар кытыннылар. Сунтаар улууһун Күүкэй нэһилиэгин баһылыга Юрий Прокопьев төгүрүк остуолга кыттан, улууска эдэр исписэлиистэри үлэнэн хааччыйыы тула кэпсээтэ. Ол курдук, эдэр үлэһиттэри табыгастаах олорор усулуобуйанан хааччыйар сыалтан федеральнай, өрөспүүбүлүкэтээҕи, ону сэргэ муниципальнай көҕүлээһиннэри, бырагыраамалары үлэҕэ киллэрэллэрин туһунан иһитиннэрдэ. - Саҥа исписэлиистэри үлэҕэ ыҥырыыга нэһилиэк баһылыктара күүскэ үлэлииллэр. Саҥа үлэһиттэри олорор дьиэнэн хааччыйыы таһынан, оҕолорун уһуйаанынан, оскуоланан толору хааччыйарга дьулуһабыт. 2023 сыллаахха “Хаарбах дьиэттэн дьону көһөрүү” бырагырааманан Күүкэй нэһилиэгэр исписэлиистэргэ анаан түөрт кыбартыыралаах дьиэ тутуллан үлэҕэ киллэриллэн, эдэр үлэһиттэр олороллор. Билигин муусука, технология учууталлара тиийбэттэр. Саамай кыһалҕабыт диэн, биэлсэрбит суох. Инньэ гынан чугастааҕы нэһилиэктэртэн – Кутанаттан, Толоонтон быраас кэлэн көрөр. Билигин Сунтаарга колледжка мэдиссиинэ үлэһиттэрин үөрэтэ сылдьаллар. Онон, дуогабар быһыытынан биэлсэр үлэлии кэлиэхтээх, - диэн кэпсээтэ. Юрий Прокопьев туһааннаах пуорумнар үлэҕэ, уопут атастаһарга олус туһалаахтарын бэлиэтээн эттэ. ✍️ Анивера АКИМОВА