💥Хоорайывыска камныг болуул
💥Хоорайывыска камныг болуул 📢Кызыл хоорайның хоочун чурттакчызы мен. Бо хоорайга 50 ажыг чыл чурттап тур мен. Найысылалывыс бо чылын 112 харлаан болгай. Кандыг-даа үени аңаа чурттап эрттим. Сөөлгү каш чылдарда найысылалывыс дыка-ла чаарттынып, чараш апарып турарын эскерип тур бис. Ол дугайында Кызыл хоорайның хоочуннары чоокта чаа чыглып тургаш, аравыста чугаалажып олурдувус. Хоорай улгадып, чаа микрорайоннар немежип, школа, садиктер хөйү-биле туттунуп турарынга өөрүвестиң аргазы чок. Ажы-төл көвүдеп турар, оларга эртем-билиг чедип алырынга садиктер, школалар херек болгай. Спортту база дыка сайзырадып турар-дыр, хөй-ле улуг спорт залдары немешкен. Хөгжүлде бар, эки-дир. Ылаңгыя чоокта чаа, август айда, сарыг шажын шуулганынга болган чараш хемчеглерни магадап ханмайн көргенивисти тын алынмайн хөөрежип олурдувус. Шынап-ла, найысылалывыс шуулганның ачызында чечектелип тур. Кудумчулар арыг-силиг, оруктары чаарттынган, чаа ыяштар олурткан, бажыңнарны будаан дээш дыка-ла өскерилди. Эскереримге, хөй маңнажып турар ыттар безин чиде берди ышкаш. Назынывыс улуг-даа болза, эштерим кадайлар-биле аныяктардан чыда калбайн, янзы-бүрү хемчеглерге, ылаңгыя буянныг ажылдарда киржип чор бис. Дайын-чаада оолдарывыска четкилер аргыыр ажылга эгезинден тура киржип келдивис. Азия төвүнге эртенги шимчээшкиннер кылыр акция чарлаптарга, база күзелдиивис-биле киржир-дир бис. Ам кол бижиксеп турар чүүлүм – хоорайывысты мынчаар чараштыр септеп, чаартып каанда, боттарывыстың талазындан чурттакчы кижи бүрүзү бодунуң девискээрин ногаанчыдып, аштап-арыглап, бокталдырбайн, камныг эдилээрин күзээр-дир мен. / Анчымаа МОНГУШ, күш-ажылдың хоочуну. Кызыл хоорай. “Шын” №36 2026 чылдың сентябрь 17