💥Соңгулда-2026
💥Соңгулда-2026 📢Тес-хемчилер келир үе дээш бадылап эгелээн Бөгүн, сентябрь 18-те, Тес-Хем кожуунда Россия Федерациязының Күрүне Думазының депутаттарын болгаш Тыва Республиканың Баштыңын бадылаар соңгулдалар эгелээн. Кожууннуң соңгулда участоктарынга даң бажындан тура боттарының хамааты хүлээлгезин күүседир сорулгалыг өг-бүлелер ажы-төлүн эдерткен кээп эгелээн. Соңгулдалар хүннери дыка хөй кижилерге чаңгыс демниң болгаш төрээн чуртунуң салым-чолу дээш харыысалгалыг байырланчыг хүн апарган. Соңгулдага бир дугаар кожууннуң удуртукчулары хамааты хүлээлгезин күүседип келгеннер. Тес-Хем кожууннуң Төлээлекчилер хуралының баштыңы Аян-оол Лаңаа Ак-Эрик сумузунда бодунуң участогунга барып соңгаан. Самагалдайда кол соңгулда участогунга кожууннуң чагырга даргазы Эдуард Эртине хааржакче бюллетеньнерин суккан. «Бистиң бөгүнгү шилилгевистен кожуунувустуң хөгжүлдези база өг-бүле бүрүзүнүң чаагай чоруу хамааржыр. Чаңгыс чер чурттугларымны хамааты туружун идепкейлиг көргүзерин кыйгырып тур мен. Ол дээрге Тываның келир үезинче шиитпирлиг базым-дыр» — деп, Тес-Хем кожууннуң чагырга даргазы Эдуард Эртине чугаалаан. Тес-Хем кожууннуң Төлээлекчилер хуралының баштыңы Аян-оол Лаңаа чаңгыс чер чурттугларының соңгулдага идепкейлиг киржип турарын дыңнаткан: «Кижилер соңгулда участоктарынче ажы-төлүн эдерткен, өөрүшкүлүг кээп турарын көрүп тур бис. Ол дээрге демниивисти көргүзүп турарывыс-тыр. Кожууннуң чаагайжыдылгазы болгаш чаа объектилер тудар талазы-биле улуг планнарлыг бис. Ол төлевилелдерни боттандырарынга чурттакчы кижи бүрүзүнүң деткимчези дыка херек». Үш хонук дургузунда шупту сумуларда соңгулда участоктары ажылдаар: Самагалдайда, Ак-Эрикте, Белдир-Арыгда, Чыргалаңдыда дээш өске-даа чурттакчылыг пунктуларда. Соңгулдаларга чүгле хоочуннар идепкейин көргүзүп турар эвес, бир дугаар соңгуп турар аныяктар база эки киржип турар. Эң-не аныяк соңгукчуларга тураскаалдыг суй белектер тыпсырын база организастаан. Соңгулда комиссиялары хамааты бүрүзүнүң айыыл чок чоруун болгаш күзелин илередириниң чажыдын хандырары-биле штаттыг чурумда ажылдап турар. Шупту участоктарда чаа хевирниң өттүр көстүп турар урналарын болгаш амгы үениң соңгулда бюллетеньнерин ажылдап кылыр амгы үениң комплекстерин (КОИБ) тургускан. Чедери берге черниң чурттакчы бүрүзү бодунуң шилилгезин кылыр кылдыр ыраккы малчын аалдарже үнүүшкүн бригадалары чорупкан. Бадылаашкыннар үш хүн дургузунда болур — сентябрь 18, 19, 20-де. Соңгулда участоктары хүннүң-не 8.00-дан 20.00 шакка чедир ажылдаар. Медээни болгаш чуруктарны Тес-Хемниң чагыргазының социал четкиде арнындан алган.