💥Соңгулданың бирги хүнү байырымныг эгелээн
💥Соңгулданың бирги хүнү байырымныг эгелээн 📢Кызыл хоорайның № 14 Чүлдүм соңгулда участогу ажылын эгелээн. 7 шак 45 минута турда-ла, соңгукчулар ийилеп-бирлеп чыглып чоруй, 8.00 шакта элээн хөй кижи чыглып келген. Россияның, Тываның Ыдык ырлары-биле үш хүн уламчылаар чымыштыг ажылдың баштайгы хүнү эгелээн. Даңзы ёзугаар бо соңгулда участогунда 2458 соңгукчу бар, ындыг-даа болза ажылдап, чурттап турар чериниң аайы-биле эртежик билдириишкин кииргеш, соңгуп кээп турар болгаш немелде даңзыже кирер ужурга таварышкан хамаатылар баштайгы минуталарда-ла кээп эгелээн. Эң бир дугаарында Федералдыг үндүрүг албанында ажылдап турар Белекмаа Куулар чедип келгеш, хамааты хүлээлгезин ак сеткилдиг күүседиринге, чурттуң келир үезинге үлүүн киириштирип, үнүн бээринге беленин чугаалады. Ооң бадылап каан бюлетеньнери бир дугаар хараачыгайлар болуп, өттүр көстүп турар хааржакче ужуп кирген соонда, шуужа берди. Ийи дугаарында Росреестрниң Тывада эргелелинге ажылдап чораан Алексей өөнүң ишти-биле чедип келдилер. Соңгукчулар кудумчу аайы-биле оочурлай бээр идепкей баштайгы минуталарда-ла көстүп келген. Хөй-ниити хайгааракчылары база ажылчын олуттарында. Дашкаар үнүп кээрге, Тываның эртем-шинчилел институду болгаш Социал шинчилелдер төвүнүң ажылдакчылары соңгукчулар-биле чугаалажып, чажыт айтырыышкынны чорудуп турда, патриочу ырлар чаңгыланган хөгжүм адаа-биле чаа-чаа соңгукчулар участокче шуужуп турлар. Чуртувустуң келир үези бистиң үнүвүстен хамааржыр, сайзырал-хөгжүлдеге бистиң шилилгевис улуг ужур-дузалыг деп хамааты көрүжү турум патриоттар сагыш-сеткилин чажырбайн, үлежир болду. Надежда КУУЛАР. Чуруктарда: 1. Бир дугаар соңгукчу Белекмаа Куулар 2. Идепкейлиг өг-бүле 3-10. Соңгулда участогунуң ажыл үези.