I ДҮЖҮТ АЖААЛДАЗЫ – 2026 I
I ДҮЖҮТ АЖААЛДАЗЫ – 2026 I 💥3510 тонна тарааны ажаап алган 📢Тываның август айда агаар-бойдузунуң байдалы дүжүт ажаалдазын өй-шаанда дүргени-биле чорудар арганы бербейн турган. Бо айның ийиги чартыында республикага агаар-бойдус аяс апаарга, тараажылар дүжүт ажаалдазын шапкынчыткан. Тывада дүжүт ажаалдазының дугайында ажык медээлерден алырга, сентябрь айның баштайгы хүннеринге чедир көдээниң ажыл-ишчилери 3510 тонна багай эвес шынарлыг тараа аймааның дүжүдүн ажаап алганнар. Сентябрьның баштайгы чартыында байдал-биле алырга, Таңды кожуунда тараажылар Михаил Санников биле Александр Боровиковтуң шөлдеринде бо чылын тараа аймааның дүжүдү бедик болган. Ону чидириг чокка ажаап алыр дээш, тараажылар шудургу ажылдап турар. Тарааның дүжүдү 1 гадан ортумаа-биле 17,1 центнер. Тараа шөлдериниң чамдык участоктарында дүжүт 1 гадан 25 центнер хире. Бо дээрге эрткен 2025 чылда кааңдаашкынныг чайда дүжүттүң деңнелинден барык үш хире катап хөй. Михаил Санников ажаап алган дүжүдүн тараа шыгжамырында эккеп дүжүргеш, ооң шынарының хыналдазын чорудуп турар. Эң эки шынарлыг тарааны келир 2027 чылда чазын чажар кылдыр курлавырлап эгелээн. Тываның сиген шөлдеринде мал чеминиң белеткели база үргүлчүлевишаан. Чааты хемниң унунда көктүг, шыктыг шынаада бо чылын үнген чаагай оът-сигенни мал чеминге белеткеп алыры бо хүннерде кидин түлүк. Сигенни рулоннарга дүргектей кезип азы кескен сигенни дораан-на кыштагларга аппарып чедирип турар. 2026 чылда Улуг-Хем кожууннуң мал чеминиң белеткелиниң планы 11780 тонна, ооң 10 муң тонназы белеткеттинген. Арткан тоннаны1780 белеткептер аргазы чайлыг бар. Ш. МОҢГУШ. “Шын” №36 2026 чылдың сентябрь 17