💥Каткы бажы каткан эвес...
💥Каткы бажы каткан эвес... 📢80 харлыг ирей пенсиязын алгаш, базаардан ырыктааш садып алыр дээш кылаштап келген. Баартыктарда делгээн хептер чанынга чеде бергеш, карааның шилин чодуп-чодуп дургаар аскан хөлбегер ырыктааштарны тудуп көргүлээш, садыгжыга: – Каям, кызым, меңээ бо ырыктааштың бирээзин берип көрем – дээш, акшазының хавын үжей берген. – Чок, кырган-ачай, ол дээрге ырыктааштар эвес, а панталоннар-дыр – деп, уруг харыылаан. – Па! База талоннап каан бе? 🙂 Ийи эжишкиниң бирээзи тура: – Дискотека болур деп дыңнадым, эш. Бараалам. – Каяа? – Культура одаанга. – Аңаа чүнү канчаар бис? – Таз чаяр бис – деп, баштактанган. Кежээ клубка кээрге, эжи таз тудуп алгаш келгеш: – Сээң тазың кайыл? Мээң бо – деп-тир. 🙂 Бир катап көдээде чурттап чоруур ава бичии оглунга: – Кызыл кирер бис, оглум – дээш, эдертипкеш, автобуска олурупкан. Орукка удуп-оттуп чорааш, хоорайга келгеннер. – Кызылда кирип келдивис, оглум – деп, авазы оглун оттурарга, – Кирер эжии кайда ирги? – деп, оглу айтырып-тыр. “Шын” №31 2026 чылдың август 13