💥Тергииннерни шаңнап-мактаан
💥Тергииннерни шаңнап-мактаан 📣Август 15-те, Республика хүнүнде, Улусчу чогаадылга бажыңынга регионнуң хөгжүлдезинге улуг үлүг-хуузун киирген кижилерге күрүне шаңналдарын тывыскан. Тываның Баштыңы Владислав Ховалыг Республика хүнүнүң төөгүлүг ужур-утказын демдеглээн. Тыва күрүнениң 105 харлааны Өг-бүлениң болгаш тургузукчу күш-ажылдың чылында таваржы бергени салгалдар аразында быжыг харылзааның демдээ дээрзин ол онзалап демдеглээн. "Амгы үеде бистиң республикавыс идепкейжи экономиктиг өзүлдениң болгаш улуг хемчээлдиг чаартылганың оруунче кирген. Федералдыг төптүң деткимчези-биле бүдүрүлгени сайзырадып, социал адырны чаартып, инвестицияларга эки байдалды тургузуп турар бис" — деп, ол чугаалаан. Владислав Ховалыг энергетика талазы-биле улуг төлевилелдерниң боттанылгазы, чурттаар оран-сава тудуунуң көвүдээни, мелиорация талазы-биле программаларны салганы дээш кол-кол чедиишкиннерже кичээнгейни угландырган. Удуртукчунуң чугаалап турары-биле алырга, ук хемчеглер көскү түңнелдерни эккелген. Регионда ажыл чок чорук эвээжээн, өг-бүлелерниң орулгалары чоорту өзүп турар. Ооң соонда көдээ ажыл-агый, өөредилге, культура, бүдүрүлге дээш аңгы-аңгы адырларның тергииннеринге хүндүлүг аттарны, медальдарны болгаш өөрүп четтириишкин бижиктерин тывыскан. Оларның аразында арга-дуржулгалыг күш-ажылдың хоочуннары болгаш аныяк специалистер бар. Онза кичээнгейни өг-бүлениң үнелелдерин кадагалап арттырганы дээш медальдарга төлептиг болганнарже болгаш Ада-чурттуң камгалакчыларынче угландырган. Тываның Баштыңы ТШО киржикчилеринге болгаш фронтуга идепкейлиг дузалажып турар чурттакчыларга ханы хүндүткелин илеретпишаан, ёзулуг патриотчу чоруктуң үлегер-чижээ олар дээрзин демдеглээн. "Кандыг-даа чедиишкинниң, үре-түңнелдиг ажылдың артында бистиң чаңгыс чер чурттугларывыстың хүн бүрүде кылып чорудуп турар ажылы бар. Ылаңгыя күш-ажылдың кижизинге болгаш быжыг өг-бүлеге хүндүткел бистиң республикавыстың хөгжүлдезиниң кол күжү болуп артып каар" — деп, Владислав Ховалыг чурттакчы чонга байырын чедирбишаан түңнээн. Бистиң корр. Буян Ооржактың тырттырган чуруктары