💥Хөлдер, сугларга кичээнгейлиг болуулуңар!
💥Хөлдер, сугларга кичээнгейлиг болуулуңар! 📢Владислав Ховалыг хөлдер болгаш хемнер кыдыынга дыштанып тургаш, кончуг кичээнгейлиг болурун чаңгыс чер чурттугларындан социал четкилер таварыштыр дилээн. Ооң кол чылдагааны — суг объектилеринде өлүмнүг болуушкуннарның санының көвүдээни. Онза байдалдар яамызының регионалдыг эргелелиниң дыңнадып турары-биле алырга, чыл эгезинден бээр Тывада 6 кижи сугга дүшкен, ооң 3-ү – чаштар. Айыыл-халаптарның чылдагааннары чаңгыс – бодунуң айыыл чок чоруунга харыысалга чогу болгаш серемчилел чогунда деп республика Баштыңы айыткан. «Эзирик кажанда-даа сугже кирбеңер, уругларны чаңгыс-даа минута хайгаарал чок арттырбаңар, бодуңарның шыдалыңарны таптыг боданып көрүңер» — деп, ол сугга айыыл чок чоруктуң кол дүрүмнерин сагындырган. Бо бөдүүн болгаш билдингир дүрүмнерни хөй-ле улус уттуп алыр. Ооң бадыткалы – Кызылга 12 харлыг ийи уругнуң чок болганы, база бир элээди уругнуң улуг улустуң хайгааралы чокка бодунуң үе-чергези эштери-биле эштип турганы. Шак-ла ындыг байдалда база ийи назы четпээннер сугга дүже бергенде, камгалап алганы – аас-кежиктиг таварылга. Тываның Баштыңы чогуур ведомстволар болгаш муниципалдыг чагыргалар удуртукчуларындан сугларга болгаш эштир черлерге патрульдаашкынны күштелдирерин негээн. «Рейдилерже үнүп, чон-биле профилактиктиг ажылды күштелдирерин негеп тур мен. Бо угланыышкынга контроль шыңгыы болур ужурлуг» — деп, ол сагындырган. Бистиң корр. Чурукту ТР-ниң Чазааның парлалга албанындан алган. Шын №30 2026 чылдың август 5
Канал в каталоге Максиметера
2 365 подписчиков · Политика