💥ФРОНТ ЧЕТКЕН МАЛЧЫН
💥ФРОНТ ЧЕТКЕН МАЛЧЫН 📢Кыргыс Суваң оглу Кудажы 1894 чылда Ийи-Талга төрүттүнген. Ада-чурттуң Улуг дайыны эгелей бергенде, бүгү малының 75 хуузун чаалажып турар Кызыл Шеригге белекке берген. К.С. Кудажы бодунуң үезиниң мурнакчы кижилериниң бирээзи. Чогаалчы Кызыл-Эник Кыргысовичиниң бижип турары-биле алырга, Тывага хамааты дайын үезинде ол Сергей Кузьмич Кочетовтуң шерии-биле Эрзинниң Тарлашкын деп черге актарны чылча шаварынга база киришкен. 1943 чылда С.К. Тока баштаан тыва делегацияның база бир кежигүнү бооп, чаалажып турар шериглерге 3-кү мөөң белекти чедиришкен. Барыын фронтунуң командылакчызы алдарлыг полководчу Г.К. Жуковтуң холун туткан база ол-ла фронтунуң Хүндүлүг гвардейжизи деп атка-даа четкен, ам болза ону ооң дайын киржикчизи деп санаар. ТАР үезинде Барыкка Мал, чер ажылының эвилелин (МЧАЭ) тургускан. Ону Тывага колхозтаашкын болгужеге чедир даргалаан. 1945 чылдың апрель 29-та болган ССРЭ-ниң Дээди Совединиң соңгулдаларынга депутатка соңгуткан. 1945 чылдың июнь 24-те Москваның Кызыл шөлге болган Тиилелгениң парадын көрген. ССРЭ-ниң Дээди Совединиң депутадынга ийи удаа соңгудуп чораан. Тывага социалистиг ниитилелди тургузар. Улуг Ада-чурт ССРЭ-ниң мурнунга ачы-хавыяазы дээш дээди шаңнал – Ленин ордени-биле шаңнаткан. Пенсия үнгүже чедир Ийи-Талга турган Жданов аттыг совхозка малчыннап турган. Кежик-оол ЧӨРЕВЕНИҢ "Мөгейиг" деп номундан эге. Кызыл 2015 чыл. “Шын” №17 2026 чылдың май 7