| КАДЫКШЫЛ |
| КАДЫКШЫЛ | 💥Профилактика хемчеглерин күштелдирер 📢Тыва Республикада саргыга ызырткан хамаатылардан дуза дилээн таварылгалар көвүдээн. Эпидемиологтуг сезон эгелээнден бээр саргыга ызырткан 117 кижи бүрүткеттинген, эрткен чылдың ол үезинге деңнээрге, 3,3 катап хөй. Сөөлгү неделяда 22 кижи келген, эрткен неделяга деңнээрге, 54,2 хуу эвээш. Республиканың 16 девискээринде саргыга ызырткан таварылгалар бүрүткеттинген. Эң хөйү Кызыл кожуунда (27 таварылга), Кызыл хоорайда (22), Таңды кожуунда (15) демдеглеттинген. Саргы энцефалидинден аараанының көргүзүү-биле Сибирь федералдыг округта байдал элээн каш он чылдарда чидиг болуп артпышаан. Бо чылын Сибирьде 100 муң кижиге хамаарыштыр 4 хире кижи аараан болза, Тывада 100 муң кижиден 9 кижи аарып турары – эң бедик көргүзүглерниң бирээзи. «Ындыг байдалды болдурбазы-биле, айыылдыг бөлүкке хамааржыр кижилерни 100 хуу тарыыры чугула» – деп, республика Баштыңы Владислав Ховалыг демдеглээш, профилактика хемчеглерин күштелдирерин айыткан. Регионнуң Кадык камгалал яамызының дыңнадып турары болза, амгы үеде халдавырлыг саргы энцефалидинге удур тарылга чорудуу дески эвес. Уругларның 91 хуузу тарылганы алган болза, а 99,5 хуузу катап тарыткан. Улуг улус аразында тарыышкынның көргүзүү 41,9 хуу, катап тарытканнарның саны 44,3 хуу болуп турар. Ажыл-агыйының аайы-биле айыылдыг бөлүкке хамааржыр кижилерниң 61 хуузу саргы энцефалидинге удур тарыткан. 679,82 га девискээрни, ооң иштинде уруглар садтарының шөлдери, чевеглер, сесерликтер, Кызыл хоорайда Тиилелге шөлү, культура болгаш дыштанылганың национал парыгы дээн ышкаш черлерни саргыга удур хоран бүдүмелдер-биле чаштырар керээлер чардынган. Регионнуң Кадык камгалал яамызынга улуг улусту тарыыр планны күүседирин дагзып, муниципалдыг тургузугларда өрегелерни кезип, ажылчын коллективтер-биле ажылдаарын сүмелээн. Хөй кижилер чыглыр черлерни хораннап арыглаарын дооскаш, кылдынган ажылдарын май төнчүзүнге чедир Росхереглелхайгаарал отчеттаарын муниципалдыг районнар баштыңнарынга айыткан. А. МОНГУШ. “Шын” №17 2026 чылдың май 7 Чурукту ГигаЧатка чуруткан.