💥Чаа акция эгелээн
💥Чаа акция эгелээн 📢Улусчу фронтунуң Тывада регионалдыг салбыры Бүгү-россия чергелиг «Тиилелге дээш шак» деп акцияны чарлаан. Ооң утказы – кандыг-даа албан организацияның ажылдакчылары ажыл хүнүнүң бир шагының төлевирин ТШО-га деткимче кылдыр шилчидер. Мында шилчидер акшаның түңү кижи бүрүзүнүң бодунуң эки тура-биле киржилгезинден хамааржыр. Ажылдап турар чериниң удуртулгазынче киирер билдириишкининге ай санында ооң шалыңындан каш түңнүг акшаны ачы-дуза чедирилгезинче шилчидиксеп турарын боду бижип каар. Чарлаттынган акцияны ТР-ниң Культура яамызы хамыкты мурнай деткээн. Тускай шериг операциязының киржикчилеринге ачы-дуза чедирилгезиниң чаа хевирин республикада бар бүгү культура албан черлериниң ажылдакчылары шупту демниг деткип, чүүлдүгзүнүп турар. “ТШО киржикчилеринге аңгы-аңгы хевирниң ачы-дуза чедирилгелеринге республиканың культура ажылдакчылары доктаамал киржип турар. Бо ажыл тускай шериг операциязы эгелээн үеден бээр бо хүнге чедир уламчылап, ам бо чарлаттынган акцияга киржип эгелээн баштайгыларның бирээзи болуп турар. Оон аңгыда ТШО киржикчилерин болгаш оларның өг-бүлелерин деткиири-биле бүгү культура албан черлеринде болуп турар оюн-тоглаа, концерт, шиилерже халас олуттарны берип турар. Бо хүнге чедир шак ындыг ачы-дуза чедирилгезин 7 муң ажыг кижи алган. Бо ажыл ам-даа уламчылавышаан. Маңаа немей чугаалап каар чүүл чүл дизе, шак ындыг культура-массалыг көрүлделерже халас кирерде, ТШО киржикчизи азы ооң өг-бүлези деп шынзылга көргүзүп турбайн, ам МАХ-та тускай капсырылга-биле халас билеттерни ап болур” – деп, ТР-ниң культура сайыдының бирги оралакчызы Айлана Бижик чугаалаан. “Тываның маадырлары” программаның киржикчизи, херек кырында тускай шериг операциязының киржикчилеринге кандыг дуза херегин аңаа киржип турган Сайыт Булат билир. “Тываның дайынчылары хөй чараш сөстер орнунга, херек кырында боттуг дуза манап турарын, мен, ТШО-нуң өске-даа киржикчилери дег, билир мен. Дроннар, антидроннар болгаш өске-даа техника аймаа ам бо дораан, бо шакта, бо хүнде чугула херек. Шак ындыг техника барда, бистиң дайынчыларывыстың амы-тынын камгалап ап болур. Бо акция нарын эвес-даа болза, түңнелдиг болур деп билип тур мен. Чүге дээрге ажылдап турар кижи бүрүзү бир шактың шалың төлевирин шилчидип тура, дроннар болгаш өске-даа чугула чүүлдерни садып алыр арганы берип, ёзулуг үлүг-хуузун киирип турар боор. Амы-хууда меңээ бо акция тылдан төрээн чуртувусту камгалажырын уламчылаар арганы берип турар. Тиилелгени чедип алыры чүгле оңгудан эвес, а тылдан улуг ужур-дузалыг деткимчеден база хамааржыр” – деп, ТШО киржикчизи чугаалаан. Улусчу фронтунуң ТР-де даргазының оралакчызы Галина Сюрюн акцияның эгелээн хүнүнден тура Тываның Культура яамызының дораан деткээнин онзагайлап демдеглээш, өске яамы-ведомстволарга үлегер болуп турарын чугаалаан. Бо хүннерде балыгланган дайынчылар дажыырынга ажыглаар чүък сөөртүр коштунчулуг квадроцикл хереглеп турар чагыг киргенин сагындырган. Оон аңгыда ТШО киржикчилерин деткиири-биле апрель 21-де “Частың баштай частыр чечээ” деп концерт чарлаанын дыңнаткан. Тываның көскү артистериниң киржилгези-биле болур концерттен кирген орулганы шуптузун ТШО киржикчилеринге херек чүүлдер садарынче ажыглаар деп турар. 1960-1980 чылдарның хиттери кирген программалыг концерттиң биледин садып алгаш, ТШО-га дузаламчы болур ачы-дуза чедирилгезинге кижи бүрүзү ынчалдыр үлүг-хуузун киирип болурун Тываның алдарлыг артизи Галина Сюрюн дыңнаткан. «Тиилелге дээш шак» деп акция ТШО-нуң төнчүзүнге чедир уламчылаар дээрзин сагындыраал. Сорунза МОНГУШ. Авторнуң тырттырган чуруктары. “Шын” №15 2026 чылдың апрель 23 "Шын" солуннуң МАХ-каналынга каттыжыңар max.ru/join/egenQ...