💥Шупту чүвени Тиилелге дээш
💥Шупту чүвени Тиилелге дээш 📢Тывада тускай шериг операциязында дайынчыларга гуманитарлыг дузаламчының күскү чыылдазы уламчылап турар. Күрүнениң сан-чурагайлар эргелелиниң ажылдакчылары база ачы-дузазын хүлээдип чедип келген. «Бөгүн бис коллектививис-биле электри генераторларын, шуруповёрттарны болгаш шай, кофе, таакпы, идик оъттары дээш оон-даа өске чугула херек чүүлдерни эккелдивис. Чажырттынар четкилерни база аргып турар бис» – деп, Күрүнениң федералдыг сан-чурагайлар албанының эргелелиниң начальниги Темир Кулдун дыңнаткан. Шүүгү-медицина бюрозу мурнуку одуругда эмчилерге кылын камгалал хептер, респираторлар, маскалар дээш хууда камгалал дерилге херекселдерин суккан 30 улуг хааржактарны хүлээткен. Эксперттер буянныг бо херекте доктаамал киржип турар. "Амгы үеде Донда Ростовта коллегаларывыс-биле доктаамал харылзажып турар бис. Тускай даалгаларны күүседип, ынаар база чедип турар бис. Удаа-дараа дузалажып, коллегаларывысты деткиирин ам-даа уламчылаар бис" - деп Шүүгү-медицина экспертизазының бюрозунуң начальнигиниң хүлээлгезин күүседип турар Андрей Чечек тайылбырлаан. Соок келген тудум оңгуларга чылыг айтырыын мурнады көөрү чугула апарган. Республиканың карате федерациязы хүн бүрүде хереглеттинер чугула ажыктыг херекселдерни болгаш бичежек эптиг чылыдыкчыларны эккелген. Олар хөй улустуң холунга турар кылдыр дузаламчының кышкы чыылдазында элээн көвүдедир чагыдып алырын планнап турарын Тываның Карате федерациязының удуртукчузу Чингиз Алиев чугаалаан. Дөрт чүък машиназын долдуруп, ниитизи-биле 40 тоннадан эвээш эвес дузаламчыны чорудар. Камгалакчыларга кандыг-даа орукка халдыр 6 машинаны база чедирер. Мурнуку одуругда дайынчыларга генераторлар, чылыг үрдүрер пушкалар, рациялар, дрон детекторлары дээн ышкаш техниктиг дериг-херекселдер болгаш тудуг материалдары база камгалал четкилер ам-даа хереглеттинип турар. Гуманитарлыг дузаламчының күскү чыылдазы октябрь 21-ге чедир уламчылаарын сагындыраал. Кызылдың Чүлдүм кудумчузунуң 40А дугаар бажыңында Улусчу фронтунуң күүсекчи комитединде чыылда пунктузу доктаамал ажылдап турар. Бистиң корр. Буян ООРЖАКТЫҢ тырттырган чуруктары. “Шын” №40 2026 чылдың октябрь 15