💥Өөредилге адырында чедиишкиннер
💥Өөредилге адырында чедиишкиннер 📢2025 чылда ТР-ниң Чазааның отчёдун сайгарып тура, өөредилге адырында дараазында чедиишкиннерге доктаап болур: «Чаңгыс демниг Россия» партиязының саналдап үндүргени «Аныяктар болгаш уруглар» национал төлевилелдиң шугуму-биле шак-ла ындыг аттыг федералдыг программаның ачызында Тывага 2025 чылда 6 чаа школаны ажыглалче киирген: Кызылдың 21 болгаш 22 дугаар школалары, Чадаананың 2 дугаар школазы, Таңдының Бай-Хаак, Улуг-Хемниң Чодураа суурларында болгаш хоорай чергелиг Каа-Хем суурда школалар. Ол-ла төлевилел-биле 7 школага капитал септелгени чоруткан: Чеди-Хөлдүң Хову-Аксы, Кызыл кожууннуң Терлиг-Хая, Сүт-Хөл кожууннуң Бора-Тайга, Тес-Хем кожууннуң Чыргалаңды, Кызыл кожууннуң Сукпак, Барыын-Хемчиктиң Аксы-Барлык, Бай-Тайганың Кызыл-Даг школалары. Бо школаларның материал-техниктиг баазаларын база чаартып, чаа дериг-херекселдер-биле чүмнээн. 📢 «Бистиң чуртувустуң төөгүзү. Тыва» деп регион төөгүзүнүң күрүне чергелиг өөредилге ному федералдыг төлевилелдиң иштинде регионнар аразынга эң эки 10 өөредилге номунуң санынче кирген. 📢 «Чылдың башкызы» деп Бүгү-россияның башкыларның мергежилин бедидер мөөрейге физика башкызы Айдаш Хертек тиилекчилер одуруунче кирген. 📢 Республиканың экономиктиг сайзыралынга херек кадрларны белеткээр дээш ортумак профессионал өөредилге системазын хөгжүдеринче угланган «Профессионалитет» федералдыг төлевилелди Тывада боттандырып турар. 📢 «Сферум» платформаны ажыглалга киирип, өөредилге албан черлеринге чурагайлыг сервистерни ажыглап, сайзырадып эгелээн. 📢 Бүгү-россияның мөөрейлеринге, олимпиадаларынга болгаш төлевилелдеринге школачылар болгаш студентилерни хаара тудуп, салым-чаяанныг уругларны болгаш аныяктарны деткиир ажыл уламчылап турар. 📢 Уруглар болгаш аныяктарның салым-чаяанын илередир болгаш деткиир системаны хөгжүдер талазы-биле 312 республика хемчээлдиг хемчеглерни чыл дургузунда эрттирген, аңаа республиканың уруглар болгаш аныяктарының ниити санының 52,96 хуузу азы 84 518 кижи киришкен. Бистиң корр. ТМГ-ниң чуруктары. “Шын” №13 2026 чылдың апрель 9