💥Каткы бажы каткан эвес
💥Каткы бажы каткан эвес 📢Хүннүң-не телефонун холдан салбас 5-ки классчы Васяны кырган-авазы көргеш, чемелеп чугаалаан: – Шак шагы-биле телефон суйбап олурбайн, номнардан хөй номчуур болзуңза эки чүве-дир ийин. Өөредилгең-даа экижиир, эртемче чүткүлүң күштелир болгай. Канчап билир, өзүп келгеш, космонавт-даа апаар чадавас сен. – Ол чүү дээриң ол, кырган-авай. Мен ол чокта интернет четкизинде ужудуп тур ышкажыл мен. Көр даан, кайы чуртта чүү болуп турарын моон көрүп олурар мен. Онаалгаларым база моон көргеш, кылып алыр мен – деп, Вася телефондан караан көдүрбейн харыылаан. 🙂 🙂 – Павлик, өзүп келгеш, кым болуксап тур сен? – деп, 6 “А” класстың башкызы айтырган. – Өзүп келгеш, хөй акшалыг бай кижи болуксап тур мен. Кадайымга бриллиантылыг каасталгалар, аар өртектиг негей тоннар болгаш Феррари автомашинаның сөөлгү моделин садып бээр ийик мен. – Чаа, Павлик, олуруп ал. Сен кым болуксап тур сен, Валя? – Мен өзүп келгеш, Валентина Терешкова ышкаш космонавт болуксаар турдум. Ам Павликтиң кадайы болуксай бердим – деп, Валя шын сеткилинден чугаалаан. 🙂 🙂 6 харлыг Гриша авазынга мынча дээн: – Чок, авай. Мен өзүп келгеш, чүгле космонавт болур мен. Кадайым мени хүннүң-не: “...аяктарны чуг, садыгже халааш кел, шаланы чуй каавыт, хевисти какта...” деп айбылап шыдавас болур. Мени кыйгырарга – мен космоста болур мен! Экизин көр даан! Чуруктарны ГигаЧатка чураан. “Шын” №13 2026 чылдың апрель 9