💥Ном саңы — ёзу-чаңчылдарның шыгжамыры
💥Ном саңы — ёзу-чаңчылдарның шыгжамыры 📢Сентябрь 30-де Чаа-Хөл кожууннуң Чаа-Хөл суурунга кожууннуң Төп модельдиг ном саңының байырлыг ажыдыышкыны болган. Ону “Өг-бүле” федералдыг национал төлевилелдиң деткимчези-биле чаарткан. Ынчалдыр бо хүнде республика девискээринде чаартып туткан 23 модельдиг ном саңы бар болуп турар. Ном саңын чаарттып кылырынче 8 сая рубль федералдыг деткимчени үндүрген. Ол акша-түңнү оран-саваның бодун эде чаартырындан аңгыда, чаа эт-сеп, дериг-херекселдер, ном курлавырын немээш, ажылдакчыларның билиин бедидер өөредилгеже база чараан. Ном саңының оран-савазынга бүрүнү-биле улуг септелгени Чаа-Хөл кожууннуң чагыргазы акшаландырган. Чаарттынган ном саңының байырлыг ажыдыышкынынга дарга-бошкалардан аңгыда, ук кожууннуң библиотекаларының удуртукчулары, кожууннуң номчукчулары чыглып киришкен. Чаңчыл сагаан кызыл кожааны кожууннуң чагырыкчызы Аркадий Одегей, Тываның Пушкин аттыг Национал ном саңының директору Ирина Эртине, Чаа-Хөл кожууннуң Төп библиотека системазының директору Чойганмаа Одегей болгаш бичии номчукчу кескен. Чаартып кылган ном саңында сес аңгы булуң ажылдап турар: инфозона, номчукчулар хүлээп алыр чер, мультимедия булуңу, чурт-шинчилел булуңу, шыпшың булуң, номчуттунуп дыштаныр булуң, конференц-зал болгаш бичии уруглар булуңу. Библиотекага келген номчукчулар интернет кошкан дөрт компьютерни, ноутбукту, интерактивтиг панельди, телевизорну, А3 хемчээлдиг өңнүг принтерни, экран ажыглаар проекторну, чурагайлыг фотокамераны, виртуалдыг карак шили болгаш портативтиг аудиосистеманы ажыглап болур. Оон аңгыда уран-чечен литература, энциклопедиялар, уругларга болгаш назы четпээннерге номнар, караа көрбес улуска Брайл шрифтилиг номнар болгаш школа назыны четпээн чаштарга интерактивтиг оюннарны садып алырынче 1,2 сая рубль чарыттынган. Бо ном саңының кол угланыышкыны – Тываның культурлуг өнчүзүн кадагалаары болгаш чон аразынга ону нептередири. Номга ынактарны деткиир болгаш өг-бүлеге номчулга культуразын сайзырадыр сорулга-биле “Библиоөг – ёзу-чаңчылдарның шыгжамыры” төлевилелди боттандырары көрдүнген: мобильдиг интерактивтиг шөлчүгешке чаңчылчаан национал идик-хепти, дериг-херекселдерни делгээр болгаш аңаа өөредиглиг оюннар, мастер-класстарны база эрттирер. Уругларга болгаш өг-бүлелерге “Бичии номчукчунуң школазы”, “Эки сеткилдиң делегейи”, “Ном кокпазы” болгаш “Хуулгаазын чүъктешки” деп төлевилелдерни база аңаа боттандырар дээн. / Сорунза МОНГУШ. Чуруктар болгаш медээни Чаа-Хөл кожууннуң социал четкиде арнындан алган. “Шын” № 39 2026 чылдың октябрь 8