💥АЖЫКТЫГ СҮМЕЛЕР
💥АЖЫКТЫГ СҮМЕЛЕР Хеп-сыныңар эрте дээре элевезин, үр үеде ажыглаттынзын дээр болзуңарза, аңаа эки ажаалда херек. Идик-хепти чүгле чуурунда эвес, үргүлчү аштап-арыглап турарындан эдилгези үр болур. Чижээ, трикотаж азы чымчак дүктен аргаан, даараан хептерниң дүрбүжер черлери бо-ла борбактажып каар болгай. Ону аргалыг-ла болза борбакташкан дүктер аштаар тускай машинка-биле арыглаары күзенчиг. Хол-биле үзе дыртып, аштаарга пөстүң нарын дүгү уштунгаш, улам борбактажыр апаар. Идик-хепке чыпшынган баш дүктери азы быйыргын бокту бок аштаар тускай «ролик»-биле аштаарга дүрген-даа. Ылаңгыя бажыңында ыт, моортай азырап турар улуска ол херексел эң-не дузалыг. Бусталдырар херексел (отпариватель) база дыка ажыктыг, хеп-сынны хөй катап чуп, илиир-биле базып турбас, бустаптарга хевир кирип, чаартына бээр. База бир эң-не ажыктыг херексел — хеп чугдурар хапчыгаштар. Чүгле хеп-сынны эвес, кроссовки, чайгы идиктерни (чүгле хөм, замша эвес) безин хаптааш, автомат машинага чугдуруп болур. Идиктер болгаш сумкаларны аштаарда, щёткалар биле суг сиңирер тускай пөстерни ажыглаар. “Шын” № 39 2026 чылдың октябрь 8