💥Аъш-чем бүдүрүлгезиниң ажылын сонуургаан
💥Аъш-чем бүдүрүлгезиниң ажылын сонуургаан 📢Көдээ ажыл-агый болгаш болбаазырадылга үлетпүрүнүң ажылдакчыларының хүнүн уткуштур Тыва Республиканың Көдээ ажыл-агый болгаш аъш-чем яамызы Кызылдың президентиниң кадет училищезиниң болгаш П.А. Морозов аттыг көдээ ажыл-агый лицейиниң өөреникчилеринге тус черниң бүдүрүкчүлеринче экскурсияны организастаан. Бир-ле дугаарында «Тайга 17» бүдүрүлге черинге школачылар доктааган. Ук бүдүрүлгениң удуртукчузу Аяна Борисовна арга-арыгның кат-чимизинден янзы-бүрү вареньелерни, консерваларны болгаш өске-даа продукцияны канчаар кылырын тайылбырлап көргүскен. Сөөлүнде чигирзиг чемнерни өөреникчилер амзаан. Дараазында Валентин Ёнданның башкарып турары «Тыва эът» комбинадынга четкеннер. Өөреникчилер колбаса болгаш эъттен кылган чемнер бүдүрүлгезин көргеннер. Манчы, бууза кылыр эътти белеткээринден эгелээш, болу берген продукцияның шынарын хынаарын база сонуургааннар. Ол ышкаш колбаса болгаш салямини амзап чигеннер. Элээдилерге шак мындыг үнүүшкүннер тус черде бизнезиниң хөгжүлдезиниң дугайын билип алыр арга болган. Хууда бүдүрүлге черлеринде кандыг специалистер ажылдап турарын билип ап, регионнуң көдээ ажыл-агый болгаш аъш-чем бүдүрүлгези-биле таныжып алырынга дузалаар дээрзи билдингир. ТР-ниң Көдээ ажыл-агый яамызының сайтызындан А. ОНДАР белеткээн. “Шын” №40 2026 чылдың октябрь 15