| МЕДЭЭ |
| МЕДЭЭ | 💥Тайгада байдал хайгааралда 📢Октябрь айның эгезинден тура бойдус камгалаар албан черлери бистиң республиканың эң-не чедери берге черлеринге улуг ажылды чоруткан. Октябрь 1-ден 10 хүннеринде Тываның Аңныыр хайгааралының күрүне комитеди, Балык ажыл-агыйының хайгааралы, ТР-ниң Арга-арыг болгаш бойдус ажыглалының яамызының “Тыва” бойдус парыгының ажылдакчылары демнежип алгаш, Биче Енисейниң бажынче үнүүшкүннерни кылганнар. Айыыл тургуспазы-биле чогуур хемчеглерни харыысалгалыг албан черлери кылган. Тайгада байдалды доктаамал хайгаарап турар. Үнүүшкүннер үезинде онза камгалалдыг бойдус девискээринден дашкаар 9 адыгны узуткаан. Ол муңгаранчыг-даа болза, черлик амытаннар кижилерден кортпайн, амы-тынга ёзулуг айыылды тургузуп турар болганда, оон өске арга чок. Ол ышкаш тус черниң чурттакчыларынга тайылбыр ажылын база чоруткан. Амгы үеде бүгү чурттуң кайы-даа булуңнарында эң-не нептереңгей апарган мажаалайлар кижилерни коргутпушаан хевээр. Кижиниң чурттап турар чериниң чоогунга чыылган бок база белен чем оран-саваже оларның чоокшулаарын албадап, чөрүлдээлерни тургуза бээри чугаажок. Ынчангаш Аңныыр хайгааралының күрүне комитеди чурттакчы чонну улуг хереглел чок болза, тайгаже үнмезин кыйгырып турар. Чамдык кожууннарда арга-арыгже кирерин ам-даа хоруп каан хевээр. Арыг-силигни сагыыры база чугула. Чем артынчыларын, аъш-чем хаптарын болгаш бокту арттырбазы чугула. Чүге дээрге ооң чыды адыгларның кижилерже үнүп турарының кол чылдагааны болуп турар. Чурттакчылыг черлер чоогунга араатан көстүп келзе, ол-ла дораан дүрген дуза чедирер албанның 112 деп телефон дугаарынче азы Аңныыр хайгааралының күрүне комитединиң “изиг шугумунче” дүргени-биле долгаар. Бистиң корр. Чурукту болгаш медээни ТР-ниң Арга-арыг ажыл-агый яамызындан алган. “Шын” №40 2026 чылдың октябрь 15