💥Анна Шириин-оол аттыг клуб
💥Анна Шириин-оол аттыг клуб 📢Октябрь 10-да Кызыл кожууннуң Баян-Кол суурунуң тургустунганындан бээр 100 чылы, Культура бажыңының 85 чыл оюн демдеглээн байырлыг хемчег болган. Аңаа В. Көк-оол аттыг национал хөгжүм-шии театрының артистериниң киржилгези-биле РФ-тиң алдарлыг артизи, Тыва Республиканың улустуң артизи, бүгү назынында төрээн театрынга хөй-хөй рольдарны ойнап, уран чүүлге бараан болуп чораан хүндүлүг артист Анна Оюновна Шириин-оолдуң ады-биле өскен-төрээн суурунуң клувун адаан. Сураглыг артистиң адын мөңгежиткен чылыг сактыышкыннарлыг чараш концертке РФ-тиң алдарлыг артизи, Тываның улустуң артизи Анзат Куулар, Тываның улустуң артистери Дыртык Монгуш (Анна Оюновнаның студент чылдарындан эжи, коллегазы), Луиза Мортай-оол, Надежда Наксыл, Тываның алдарлыг артистери Елизавета Монгуш, Айзана Чылбак-оол, Надежда Ооржак болгаш театрның артистери Елена Ооржак, Надежда Салчак киришкеннер. Сценаже үнген артист бүрүзүнүң күүселдезин баян-колчулар чылыы-биле хүлээп ап, адыштарын харам чокка часкап турган. Солун оюн-көргүзүглүг чараш концертти хөйге билдингир Орлан Дамба-Хуурак башкарып эрттирген. Ол Анна, Хертек Шириин-оолдарның өг-бүлези-биле хөй чылдар дургузунда чоок эдержип чораан болгаш оларның чогаадыкчы ажыл-ижиниң төөгүзүнден солун сактыышкыннарны чугаалап, 30 чыл бурунгаар ол-ла клубка болган концертти бижиткен флешканы баян-колчуларга белекке берген. Анна Шириин-оолдуң адын эдилээн Культура бажыңынга концерт, оюн-көргүзүг үзүктел чок көрүкчүлерин өөртүп чоруурун, сураглыг артистиң чырык ады хөйнүң чүректеринге кезээ мөңгеде артар болзун деп театрның артистери күзээш, чылыг хүлээп алыышкыны дээш, баян-колчуларга өөрүп четтиргенин илереткен. Медээни болгаш чуруктарны В. Көк-оол аттыг национал хөгжүм-шии театрының социал четкиде арнындан үлешкен. “Шын” №40 2026 чылдың октябрь 15