💥Хөөмейжиниң адын мөңгежиткен
💥Хөөмейжиниң адын мөңгежиткен 📢Октябрь 5-те Мөңгүн-Тайганың Мугур-Аксында Культура болгаш дыштанылга төвүнге хөөмей-сыгыт, ыр-шоор чаңгыланган онзагай хемчег болуп эрткен. Чүгле өскен-төрээн кожуунун эвес, бүгү Тываны ырак-чоокка алдаржыткан Тываның улустуң хөөмейжизи, Тыва Республиканың алдарлыг артизи, Тываның культуразының тергиини чораан Каң-Хүлер Сааяга мөңгүн-тайгажылар чоргааралын илередип, ооң чырык адын мөңгежидери-биле чаа туттунган культура одаан ооң ады-биле адаан. Аңаа Тываның национал оркестри, «Khoomei Beat» этно-поп-рок бөлүк болгаш эгин кожа ажылдап чораан сураглыг хөөмейжилер черниң ыраан ыраксынмайн, эжинге чылыг сактыышкыннарны кылып, чыылганнарның сагыш-сеткилин доюлдуруп, кайгамчыктыг хөгжүм делегейинче эдертип, солун концертти бараалгатканнар. Каң-Хүлер Саая хөй талалыг ховар салым-чаяанныг. Ол бедик үнге ырлаар ыраажы, ховар дирткен даг каргыраазын күүсетпишаан, аңгы-аңгы хөгжүм херекселдеринге ойнап чораан. Ооң кылып чораан чогаадыкчы ажыл-ижи республиканың культурлуг өнчүзүнде база бир көскү исти арттырган. Мугур-Аксынга 2021 чылда федералдыг программа-биле туттунган Культура болгаш дыштанылга төвүн Каң-Хүлер Сааяның ады-биле адааны, чүгле ооң адын мөңгежидип, чырык сактыышкын кылганы эвес, а тыва чоннуң культурлуг өнчүзүн келир салгалдарга дамчыдып, кадагалап арттырарынга чугула базым болган. Медээ болгаш чуруктарны Мөңгүн-Тайга кожууннуң социал четкиде арнындан алган. “Шын” №40 2026 чылдың октябрь 15