МӨӨРЕЙ, МӨӨРЕЙ...
МӨӨРЕЙ, МӨӨРЕЙ... 💥Төрээн Тывам — алдын черим 📢Октябрь 16-да Бай-Тайга кожууннун Ээр-Хавак сумузунга улуг байырлал болуп эрткен. Сумунуң чаа клувунга ССРЭ-ниң культуразынын тергиини, Тыва АССР-ниң культуразының алдарлыг ажылдакчызы, ТР-ниң Композиторларының чогаадыкчы эвилелиниң кежигүнү, Бай-Тайга кожууннуң хүндүлүг хамаатызы Борис Салчакович Чамбыттың адын ооң сезен харлаан юбилейинге тураскаадып тывыскан солун кежээ болган. Б.С. Чамбыт Тывада ады-сураа алгаан композитор. Ниитизи-биле 200 ажыг ырыларны бижээн. Чоокта чаа ол бичии чаштарга тураскааткан ырларының чыындызын парлаткан. Улус-чон ону база-ла улуг сонуургал-биле уткаан. Чаа клубка киргеш, хамыкты мурнай сумунуң чурттакчылары, күш-ажылдың хоочуннары алдарлыг кижилерге тураскааткан улуг стендини сонуургадывыс. Кымнарны ында чок дээр! Ногаажылар, тараажылар, механизаторлар, хөгжүмчүлер, артистер, чогаалчылар, малчыннар... "Төрээн Тывам — алдын черим" деп ыры мөөрейиниң эгелээр мурнунда Бай-Тайга кожууннуң баштыңы Роберт Аракчаа, кожуун чагыргазының даргазының оралакчызы Альберт Арапчыт олар чыылганнарга болгаш юбиляр композитор Борис Чамбытка байыр чедирип, суй белектерни сунган. Кожууннуң культура килдизиниң эргелекчизи Сайын Күжүгет Борис Салчаковичиге тыва тонну кедирди. Улаштыр Роберт Адар-оолович өөрүнчүг медээни дыңнатты: Ээр-Хавак сумузунуң чурттакчы чонунуң дилээ-биле Көдээ культура бажыңынга композитор Борис Чамбыттың адын тывыскан дээрзин чарлаптарга, көрүкчүлерниң диңмиттиг, демниг адыш часкаашкыннары үр-ле чаңгыланды. https://vk.ru/wall-201111625_71470. Светлана ДАЧЫН-ХОО. Авторнуң тырттырган чуруктары. «Шын» №41 2026 чылдың октябрь 22