💥Этнодиктантыга каттышкан
💥Этнодиктантыга каттышкан 📢Ноябрь 3-те Россияның Националдар херектериниң талазы-биле федералдыг агентилел бодунуң партнерлары-биле кады «Улуг этнографтыг диктант» деп XI делегей чергелиг чырыдыышкын акциязын эрттирген. Россияның хамааты бот-тускайлаңын быжыглаарынче, үндезин российжи сүлде-сүзүк болгаш мөзү-шынар ыдыктарын нептередиринче, төөгүнүң хажыдыышкыны-биле демисежиринче хемчегни угландырган. Бо чылын хемчег оффлайн хевирде эртип турар. Тываның чурттакчылары диктантыны 100 аңгы шөлчүгешке бижээн. Кызылдың чурттакчылары ол хүн Орус культура төвүнге, Тыва культура төвүнге, Тыва Республиканың национал музейинге диктантыны бижиир аргалыг болганнар. Республиканың кожууннарында библиотекаларга, школаларга база шөлдер ажылдаан. РФ-тиң Президентизи Владимир Путинниң чарлыы-биле доктааткан Россия Федерациязында Чоннарның чаңгыс деминиң чылында 2026 чылдың кол хемчеглер планынче «Улуг этнографтыг диктант» кирген турган. Чырыдыышкын акциязы ам он бир чыл дургузунда бистиң чуртувустуң аңгы-аңгы регионнарындан улуска боттарының билиглерин хынаар, Россияның чоннарының чаңгыс демниин база культураларынга хүндүткелин быжыглаар – ниити сорулга дээш демнежир арганы берип турар. «Эрткен чылдарда диктант онлайн болгаш оффлайн хевирге эртип турган. Бо чылын диктантыны чүгле чаңгыс хүнде боду киржир кылыр эртти- рер» — деп, ТР-ниң Националдар херектериниң талазы-биле агентилелдиң удуртукчузу Светлана Ощепкова тайылбырлаан. Бо чылдың хемчеглериниң бир онзагай чүүлү – он видео-айтырыглар болган: оларның беш айтырыын тускай шериг операциязының киржикчилери, а өске беш айтырыгны Россияның чоннарының, ооң иштинде Тываның төлээлери салган. Айтырыглар Россияның чоннарының чаңгыс деминиң чылынга тураскааттынган. Диктантының түңнелдери декабрь 12-де — Россия Федерациязының Конституция хүнүнде билдинер. Улуг этнографтыг диктантыны эрттирип эгелээнинден бээр 11 чыл дургузунда бүгү Россияда болгаш даштыкы чурттарда 21 сая ажыг кижи киришкен. Эрткен чылын, юбилейлиг чылда, Тывага 32 муң ажыг кижи диктантыны бижээн. А. Монгуш. Чурукту Тыва Чазактың парлалга албанындан алган. “Шын” №43 2026 чылдың ноябрь 5
Канал в каталоге Максиметера
2 365 подписчиков · Политика