💥Умканы түретпес дээш
💥Умканы түретпес дээш 📢Октябрь 28-те Кызылдың Аныяктар өргээзинге "Чаян Иванович биле Умка" деп барымдаалыг фильмниң хааглыг көрүлдези болуп эрткен. Аңаа тускай шериг операциязынга дайынчы хүлээлгезин күүседип тургаш, амы-тынындан чарылган Чаян Бүрбүнүң ада-иези, дөргүл-төрелдери болгаш “Кызыл” аэропорттуң база ОБЯ-ның Тывада эргелелиниң ажылдакчылары дээш өскелер-даа киришкен. Барымдаалыг фильмни “Ада-чурт камгалакчыларының аттары” төлевилел-биле тургускан. Ооң кол маадырлары — Чаян Иванович биле Умка. Фильмниң ады баз шак ындыг. Чүгле адаанда "Хатико эвес, Умка" деп база бижээн. Тургускан режиссёру, үстүнде төлевилелдиң удуртукчузу, Орлана Серен-Чимит. Ол чыылганнарга үш ай дургузунда бодунуң командазы-биле ажылдаанын дыңнаткан. Режиссёр-даа, операторлар, монтажёрлар-даа барымдаалыг фильм кылыр хире тускай профессионал мергежил чок-даа болза, боттарының кылып шыдаар шаа-биле кылгаш, фильмни аңгы-аңгы фестивальдарже чорутканын чыылганнарга тайылбырлаан. Кажан бо хүнде чанывыста кинода дег кээргенчиг төөгү болуп турда, ону дораан херекке ап, уран-чечен фильм кылыр дээн профессионал режиссёрларны мурнап үнген барымдаалыг фильмниң шынарынга хамаарыштыр чедер-четпестерни айтыры эпчок дээрзин улус билип турган. Чүге дээрге маадыр Чаянга, ооң ада-иезинге, кады төрээннеринге, шынчы ыдынга хүндүткел бирги черде. Умканың кээргенчиг төөгүзүнүң дугайында каш ай бурунгаар хөй кижи социал четкилерден, солун-сеткүүл, радио, телевидениеден көргеш, муңгак улус шаанга киир ыглажып турганын билир бис. Ол хүн улуг экрандан кээргенчиг салым-чолдуг ытты, ооң маадыр ээзиниң дөргүл-төрелиниң оглу, акызы, дуңмазы, ачазы дээш кайы хире хилинчектиг ажыг-шүжүгнү чурттап эртип турарын көргеш, ыглажып олурганнарның бирээзи болдум. Фильмден Умканың чурттаар үгек бажыңчыгажын аэропорт ажылдакчыларының боттарының акша-хөреңгизи-биле шын-на сеткилинден кылган-дыр деп көрүкчүлер өөрүп турдулар. Чок болган маадырның авазы Роза Кырыновна Бүрбү ол кежээ чон мурнунче үнүп келгеш, карааның чажын чода-чода, оглун алдаржыткан Умка дугайында сагыш човап, ону ам-даа азырап, карактап турар аэропорттуң ажылдакчыларынга, ол дугайында МИЧ-ке чырыткан журналистерге, барымдаалыг фильмни тургускан чогаадыкчы бөлүкке чавыс мөгейип, четтиргенин илереткеш, боодал чечектерни сунуп турду. Ава кижиниң сеткилиниң арыын, шыдамыын, чонунга хүндүткелдиин чыылганнар эскерип, шак мындыг биче сеткилдиг аваның кижизиткен оглу маадыр болбайн канчаар деп, улуг хүндүткел-биле чугаалажып туржуктар. Дайын шөлү эң-не каржы, ыы-сыы сиңниккен-даа болза, бузундулар аразынга сыйыңайнып чыткан эникти кээргээш, аартыктавайн, хойлап алган дайынчының энерел сеткилдии – бо аваның кижизидилгези. “Умка хилинчектени берди. Мен шериг хептиг самолёттан дүжүп кээримге, мени уткуп алгаш, ам сагыжы оожургаар чадавас. Мен ТШО чоруптум, авай” — деп, ырак хоорайже ажылдап чорупкан оглундан медээ алгаш, күжүр ава ону соксадып шыдаваан. Хайлыг чүве, ТШО-га хеймер дуңмазы Чаянның амы-тынындан чарылган чериниң чоогунга, аваның улуг оглу база амызындан маадырлыы-биле чарылган деп медээ алгаш, бо хүннерде база бир маадыр оглунуң мөчүзүн манап турар күжүр аваның сеткилин кайы хире хилинчектиг качыгдал кээргел чок оя чип турарын билир улус билир... К. МОНГУШ. Авторнуң тырттырган чуруу. “Шын” №43 2026 чылдың ноябрь 5
Канал в каталоге Максиметера
2 365 подписчиков · Политика