Күндү Үөһээ Бүлүү улууһун дьаһалтатын үлэһиттэрэ, Үрүҥ Тунах ыһыахпыт бары тэрээһиннэри...
Күндү Үөһээ Бүлүү улууһун дьаһалтатын үлэһиттэрэ, Үрүҥ Тунах ыһыахпыт бары тэрээһиннэригэр көхтөөхтүк кыттыбыт нэһилиэктэр баһылыктара, культура уонна духуобунай сайдыы департаменын, спорт управлениетын үлэһиттэрэ! Үөһээ Бүлүү улууһун дьаһалтатын уонна тус бэйэм ааппыттан эһигини, үгүс үлэнэн доҕуһуолламмыт, өрө таһымнаахтык уонна дьоһуннаахтык ыытыллыбыт, үтүө санааны үксэппит «Үөрэх-билии биһигэ – Үөһээ Бүлүү» диэн киэҥ далааһыннаах ыһыахпыт түмүктэниитинэн истиҥник эҕэрдэлиибин уонна дириҥ махталбын биллэрэбин! Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, оттон Үөһээ Бүлүү улууһугар Үөрэҕирии ситимэ төрүттэммитэ 150 сылыгар анаммыт үбүлүөйдээх ыһыахпыт эһиги туох баар күүскүтүн-күдэххитин толору анаабыккыт, түмсүүлээх үлэҕит уонна сыралаах дьулуургут түмүгүнэн дьиҥнээх бырааһынньык буолла! Улуус олохтоохторун ыһыахха көхтөөх кыттыылара, спортка ситиһиилэрэ, көхтөөх нэһилиэктэр баһылыктарын түмсүүлээх үлэлэрэ, култуура уонна спорт салаатын, улуус дьаһалтатын үлэһиттэрин күүстээх тэрийэр дьоҕурдара, тэрилтэлэр салайааччылара, хас биирдии киһи бэйэтин кылаатын киллэрбитэ уонна, биллэн турар, спонсордарбыт күүстээх өйөбүллэрэ ыһыахпыт инникитин үүнэригэр-сайдарыгар күүс-күдэх буолар. Нэһилиэктэр икки ардыларыгар культура уонна спорт көрүҥнэригэр ыытыллыбыт күрэххэ үһүс миэстэни ылан 100 000 солк наҕараадаламмыт ытык Нам нэһилиэгэр (баһылык А.И. Кардашевскай), 2-с миэстэҕэ тахсан 200 000 солк уонна кубогынан наҕараадаламмыт дьулуурдаах Үөдүгэй нэһилиэгэр (баһылык А.Ю. Иванов) уонна бу үбүлүөйдээх ыһыах муҥутуур кыайыылааҕынан буолан, ыһыах сүрүн бирииһин – УАЗ-микроавтобус – хаһаайынын үрдүк аатын сүкпүт Үөһээ Бүлүү нэһилиэгэр (баһылык М.С. Силигиянов) дорҕоонноох эҕэрдэбин тиэрдэбин! Кинилэри сэргэ национальнай бырааһынньыкпытын илэ-чахчы киэргэппит, дьонун-сэргэтин сомоҕолообут, көрүн-нарын көҕүлээбит уонна Аан Дархан ытык аатын сүкпүт көмүс куоластаах оһуохайдьыппытыгар Розанна Герасимоваҕа, быыппастыгас быччыҥнаах, эриллэҕэс иҥиирдээх, муҥутуур күүстээх уолаттарбытыгар Айсен Ботуевка, Михаил Руфовка, Игорь Ивановка эриэккэс эҕэрдэ буоллун! Бу ыһыах – биһиги сомоҕолоһуубут, биир кэлим буолуубут көстүүтэ. Хас биирдии салалта, тэрилтэ, нэһилиэк, култуура уонна спорт эйгэтин үлэһитин тус кылаата, бука бары сыралаах үлэҕит, үтүө санааҕыт, айымньылаах, көхтөөх сыһыаҥҥыт суох буолбут буоллун, ыһыахпыт бу курдук чаҕылхайдык ыытыллыа суоҕа этэ. Эһиэхэ хаһан да хатыламмат, өрөгөйдөөх, улуус олоҕун сырдатар, сайдыытын саҕар Үрүҥ Тунах ыһыахпыт ыҥырыытын ылыммыккытыгар, эппиэтинэстээхтик, бэриниилээхтик үлэлээбиккитигэр дириҥ махталбын биллэрэбин! Барыгытыгар чэгиэн туругу, дьолу-соргуну, үлэҕитигэр үрдүк ситиһиилэри, дьиэ кэргэҥҥитигэр этэҥҥэ буолууну баҕарабын! Күүскүт-уоххут Үөһээ Бүлүүбүт кэскилин туһугар өрүү туһалыы турдун! Ытыктабылы кытта, Үөһээ Бүлүү улууһун баһылыга Валерий Николаев