Боотулуу нэһилиэгэр саҥа амбулатория арылынна!
Боотулуу нэһилиэгэр саҥа амбулатория арылынна! Бүгүн, алтынньы 22 күнүгэр, Үөһээ Бүлүү улууһун Боотулуу нэһилиэгэр доруобуйа харыстабылын эйгэтигэр бэлиэ түгэн үүннэ. «Көхтөөх уһун үйэлэнии» национальнай бырайыак чэрчитинэн ыытыллар "Программа модернизации первичного звена здравоохранения в России" диэн федеральнай бырагыраамма көмөтүнэн Боотулууга аныгылыы амбулаторнай балыыһа тутуута түмүктэнэн, бүгүн үөрүүлээх быһыыга-майгыга арылынна! Бу дьоһуннаах тэрээһини Саха Өрөспүүбүлүкэтин Ил Дархана Айсен Сергеевич Николаев куйаар ситиминэн видео сибээһин нөҥүө, быһа эфиргэ арыйда. Бүгүн Саха Сирин үрдүнэн, Боотулууну кытары, Ньурба, Нам, Уус Алдан улуустарыгар уонна Дьокуускай куорат Мархатыгар биир кэмҥэ барыта биэс саҥа амбулатория арылынна. Боотулууга амбулаторияны тутуу быйыл бэс ыйыгар саҕаламмыта, бэдэрээтчит «ВИМ Строй» ХЭТ кылгас кэм иһигэр үрдүк хаачыстыбалаах үлэни оҥордо. Барыта балыыһа тутуутугар 19 мөл. 296 тыһ. солкуобай федеральнай бүддьүөттэн үп көрүллүбүтэ. Балыыһа арыллыытынан биир дойдулаахтарыгар эҕэрдэтин тиэрдэн туран, Ил Түмэн депутата Николай Николаевич Долгунов балыыһаҕа икки компьютеры ыларга анал туоһу сурук анаабыт. Туоһу суругу нэһилиэк баһылыгын эбээһинэһин толорооччу Кирилл Васильевич Гаврильев амбулатория коллективыгар үөрүүлээх быһыыга-майгыга туттарда. Санатан этэр буоллахха, Боотулуу балыыһата 1959 сыллаахха тутуллубут эргэ тутуу буолан, хаарбах туруктаах этэ. Эргэ тутууну көтүрэн, кини сиригэр саҥа, сырдык, аныгылыы быһыылаах, толору хааччыллыылаах балыыһа тутулунна. Махтанабыт олохтоох нэһилиэнньэ доруобуйатын туһугар оҥорор үлэлэрин уонна кыһамньыларын иһин дойдубут Президиэнигэр Владимир Владимирович Путиҥҥа, өрөспүүбүлүкэбит Ил Дарханыгар Айсен Сергеевич Николаевка, Саха Өрөспүүбүлүкэтин Доруобуйа харыстабылын министиэристибэтигэр. Күндү Боотулуу нэһилиэгин олохтоохторо! Эһигини бу кэрэ түгэнинэн ис сүрэхпиттэн эҕэрдэлиибин! Саҥа балыыһа эһиэхэ доруобуйаны, чэбдиги, кэлэр кэскилгэ эрэли бэлэхтээтин! Саӈа амбулатория эһиги доруобуйаҕытын харыстааһыҥҥа, хаачыстыбалаах медицинскэй өҥөнү олохтоох сиргэ ылыыга улахан төһүү күүс буоллун! Үөһээ Бүлүү улууһун баһылыга В. В. Николаев. #НациональныеПроекты #Здравоохранение #ВерхневилюйскийУлус https://max.ru/channel_VNikolaev