Саха рок музыкатын сүрэҕэ Үөһээ Бүлүүгэ тэбэр! 🤟⚡💥
Саха рок музыкатын сүрэҕэ Үөһээ Бүлүүгэ тэбэр! 🤟⚡💥 Саха рок музыкатын киэҥ эйгэҕэ аатырдыбыт «Чолбон» этно-рок бөлөх айар үлэтигэр анаммыт «Месяц культурного рока: 39 лет с Чолбон» бырайыак чэрчитинэн, Олоҥхо дьиэтигэр дьон-сэргэ кэрэхсэбилин ылбыт "Оҕо саас мичээрэ" рок фестиваль үрдүк таһымнаахтык ыытылынна! Бу бырайыак "Култуура көҕүлээһиннэрин өйүүр Президент фондатын" (ПФКИ) граанын өйөбүлүнэн ыытыллар. Санатан эттэххэ, 2025 сылга улуус баһылыгын Валерий Валерьевич Николаев сорудаҕынан Үөһээ Бүлүүгэ кэммиэрчэскэйэ суох тэрилтэлэргэ, уопсастыбаннай түмсүүлэргэ граннары суруйууга, араас грант күрэхтэригэр кыттыыга күүс-көмө буолар ресурснай киин арыллыбыта. Бу киин арыллыаҕыттан улууспутугар 8 бырайыак араас таһымнаах грааннары кыайбыттара. Ол иһигэр Анна Артуровна Иванова салайар «Месяц культурного рока: 39 лет с Чолбон» бырайыага ПФКИ граанын ылан, алтынньы ый 1 күнүттэн өрөспүүбүлүкэ таһымнаах "Чолбон" рок бөлөх аймньылаах үлэтигэр анаммыт дьоһуннаах тэрээһиннэри ыытар. Бу бырайыак чэрчитинэн Олоҥхо дьиэтигэр алтынньы 24 күнүгэр өрөспүүбүлүкэтээҕи "Оҕо саас мичээрэ" диэн эдэр ыччат рок фестиваля ыытылынна. Фестивальга барыта 9 рок бөлөх кытынна – улууспут нэһилиэктэриттэн уонна Дьокуускай куораттан. Тэрээһини биллиилээх "Сүүс үс" уонна "Ордо" этно рок бөлөхтөр ырыаларынан киэргэттилэр. Күрэҕи "Чолбон" рок бөлөх кыттааччылара Александр Иванов, Александр Ильин уонна Юрий Васильев дьүүллээтилэр, эдэр талааннарга сүбэ-ама биэрдилэр. Күрэх түмүгэр көхтөөх кыттыыны ылбыт бөлөхтөргө 5000 солкуобайдаах туоһу суруктар туттарылыннылар. Онтон кыайыылаахтарынан буоллулар: • 3-с миэстэни Үөһээ Бүлүүттэн «Тобуруокап сиэннэрэ» бөлөх ылан, Үөһээ Бүлүү улууһун дьаһалтата туруорбут бирииһинэн 40 тыһыынча солкуобайынан наҕараадаланнылар. • 2-с миэстэни Дьокуускай куораттан "Алта уон биир" бөлөх ылан, Үөһээ Бүлүү улууһун дьаһалтата туруорбут бирииһинэн 60 тыһыынча солкуобайынан наҕараадаланнылар. • Уонна Кыайыылаах аатын Үөһээ Бүлүү улууһуттан "Тэргэн ый" бөлөх ылан, бырайыак салайааччыта Анна Артуровна туруорбут 100 тыһыынча солкуобайынан наҕараадаланнылар! Бары кыайыылаахтары, кыттааччылары үрдүк ситиһиигитинэн эҕэрдэлиибит! Эдэр ыччат рок музыкаҕа интэриэһэ, дьулуура Үөһээ Бүлүүгэ, Сахабыт сиригэр култуура уонна искусство сайдыытыгар саҥа тыыны киллэрэр. Инникитин даҕаны эдэр талааннарбыт өрөспүүбүлүкэ да, дойду таһымыгар да биллэ турдуннар! Үөһээ Бүлүү улууһун дьаһалтатын пресс-сулууспата. #ПФКИ #Чолбон #ҮөһээБүлүү #МесяцКультурногоРока