#Кутурҕан
#Кутурҕан 2026 сыл алтынньы ый 27 күнүгэр улууска, өрөспүүбүлүкэҕэ киэҥник биллэр сэбиэскэй-партийнай салайааччы, РФ Коммунистическай партиятын Үөһээ Бүлүү оройуоннааҕы кэмитиэтин сэкирэтээрэ, кыраайы үөрэтээччи, Саха Өрөспүүбүлүкэтин норуотун хаһаайыстыбатын үтүөлээх үлэһитэ, “Партийнай килбиэн” бэлиэ хаһаайына, Мэйик, Үөһээ Бүлүү нэһилиэктэрин, Үөһээ Бүлүү улууһун бочуоттаах олохтооҕо, Саха Өрөспүүбүлүкэтин бочуоттаах бэтэрээнэ, улуус патриота Степанов Георгий Алексеевич 73 сааһыгар үлэ үгэнигэр сылдьан, ыарахан ыарыыттан хомолтолоохтук биһиги кэккэбититтэн туораата... Степанов Г.А. 1953 сыллаахха муус устар 25 күнүгэр Саха АССР Үөһээ Бүлүү оройуонун Мэйик нэһилиэгэр төрөөбүтэ. 1970 с. Далыр орто оскуолатын бүтэрэн баран, Маай учаастагар бибилэтиэкэринэн, онтон Мэйик кулуубугар сэбиэдиссэйинэн олоҕун-үлэтин суола саҕаламмыта. 1972-1974 сс. ытык иэһин толорон, Эстонияҕа Сэбиэскэй Армия кэккэтигэр авиационнай чааска туйгуннук сулууспалаабыта, бастакы кылаастаах авиамеханик идэтин ылбыта. Армияттан кэлэн баран, 1974 с. “Үөһээ Бүлүү” совхоз комсомольскай тэрилтэтин сэкирэтээринэн талыллан үлэлии сылдьан, бачыым көтөҕөн, Маай ыччат-комсомольскай биригээдэтигэр биригэдьииринэн тахсыбыта. 1976-1979 сс. Саха судаарыстыбаннай университетыгар хайа инженерин идэтигэр үөрэммитэ. 1979 с. Томпо оройуонун комсомол кэмитиэтин бастакы сэкирэтээринэн талыллан, киэҥ далааһыннаах үлэни ыыппыта. 1983 с. Хабаровскайдааҕы үрдүкү партийнай оскуолаҕа үөрэммитэ. Ол кэнниттэн Томпо райкомун инструкторынан, Нежданинскай рудник парткомун сэкирэтээринэн талыллыбыта. 1988-1991 сс. дойдутугар Үөһээ Бүлүүгэ төннөн кэлэн, райкомҥа отдел сэбиэдиссэйинэн, иккис сэкирэтээринэн үлэлээбитэ. Салгыы Пенсионнай фонда салайааччынан, тыа сиригэр бастакынан арыллыбыт улуус дьаһалтатын бырамыысыланнаска салаатын салайааччытынан, улуус баһылыгын бастакы солбуйааччынан, “Сапи-Полис” филиалын дириэктэринэн, Үөһээ Бүлүү бөһүөлэгин баһылыгынан, улуус дьаһалтатын аппараатын салайааччынан олус таһаарыылаахтык үлэлээбитэ. Георгий Алексеевич дьиӈнээхтик төрөөбүт дойдутугар бэриниилээх киһи этэ. Бар дьонун олоҕо тупсарын, улууһун сайдыытын туһугар ыарахан ыарыыны аахсыбакка, туруулаһан үлэлиирэ. 2018 сылтан Үөһээ Бүлүү бөһүөлэгин дьаһалтатын уопсастыбаннай сэбиэтигэр сүбэһитинэн үлэлээбитэ, бэйэтинэн бииргэ үлэлээн, бөһүөлэк үлэтин-хамнаһын тэрийсибитэ. Кини салайыытынан Манчаары оонньууларын көрсө бөһүөлэги ырааһырдыыга, кэрэ көстүүлээх оҥорорго киэҥ хабааннаах үлэлэр, субуотунньуктар ыытыллыбыттара. Георгий Алексеевич уопсастыбаннай үлэтин киһи ааҕан сиппэт. “Үөһээ Бүлүү” хаһыат корреспондена. “Куорамыкы уоттара” сыһыарыыга бөһүөлэк үлэтин-хамнаһын сырдатар селькор. Улуу сэрии уонна ветераннар советтарын, Үөһээ Бүлүүтээҕи “Историктар уонна кыраайы үөрэтээччилэр”, “Ийэ тыл”, “Оһуохай” түмсүүлэр чилиэннэрэ. Улуус олоҕун сырдатар, үтүө үлэһит дьонун үйэтитэр уонча кинигэ ааптара уонна кыттыгас ааптара. Сэрии сылын оҕолорун туһунан суруйа сылдьыбыта, инники былаана үгүс этэ. Степанов Г.А. үлэлиирин тухары дьон-сэргэ олоҕун уйгутун тупсарыыга, нэһилиэнньэ дьарыктаах буолуутугар улахан болҕомтотун ууран үлэлээбитэ. Нэһилиэгин, улууһун социальнай-экэнэмиичэскэй сайдыытыгар туһуламмыт кэскиллээх этиилэри киллэрэрэ, ол олоххо киириитин туруорсара, хонтуруоллаһара. Степанов Георгий Алексеевич улуус социальнай-экономическай сайдыытыгар сүҥкэн кылаатын киллэрбит биир бөдөҥ салайааччы быһыытынан Үөһээ Бүлүү улууһун устуоруйатыгар бигэтик киириэ, үтүө аата ааттана туруо. Улуус салалтатын аатыттан кэргэнигэр Валентина Николаевнаҕа, кыргыттарыгар Саргылаана Георгиевнаҕа, Ньургуйаана Георгиевнаҕа күтүөттэригэр, сиэннэригэр, бары аймах-билэ дьонугар, доҕотторугар-атастарыгар дириҥ кутурҕаммытын тиэрдэбит... «Үөһээ Бүлүү улууһа» муниципальнай оройуон баһылыга В.В.Николаев V ыҥырыылаах дьокутааттар Улуустааҕы Сэбиэттэрин бэрэссэдээтэлэ Н.Николаев Улуустааҕы бэтэрээннэр сэбиэттэрин бэрэссэдээтэлэ И.Чычахов