📰🍂Газетнан у номерыштыже лудаш темлена:
📰🍂Газетнан у номерыштыже лудаш темлена: ✅Волжский округысо Сотнур кундемыште пытартыш ийлаште ял калыкын илышыжым саемдышаш верч шагал огыл ыштыме. Сотнур территориальный отделым кумшо ий Людмила Яковлева вуйлата. Кучем пашашке МарГУ-н экономический факультетшым тунем пытарымыж деч вара 1993 ийыште толын. Тӱрлӧ должностьышто тыршен. 2023 ийыште кучемым вуйлаташ ӱшаненыт. Тудын дене ялын тачысе илышыж нерген "Ял илыш" лаштыкыште мутланыме. ✅Марий Эл Кугыжаныш Погынын Науко, образований да молодёжь политике шотышто профилян комитетыштыже образований отрасль дене кылдалтше йодышым каҥашеныт. Заседанийыште республикыште туныктышо-влакым ситарыме да Морко районысо Коркатово лицейыште тунемше-влаклан илыме корпусым чоҥымо дене кылдалтше мутланымаш лийын. Кумданрак "Образований" лаштыкыште лудса. ✅23 октябрьыште Марий Элын калык артистше, Марий Эл Кугыжаныш премийын лауреатше, Шкетан лӱмеш Марий национальный драме театрын художественный вуйлатышыже Роман Алексеев 50 ияш лӱмгечыжым палемда. Юбиляр нерген материалым "Тыйын шочшет, марий калык" лаштыкыште лудаш темлена. ✅Таче мемнан унана – Йылмым, сылнымутым да историйым шымлыше Валериан Михайлович Васильев лӱмеш марий институтын научный библиотекыжым вуйлатыше, Марий Эл Республикысе тӱвыран сулло пашаеҥже Галина Байкова. Шукерте огыл тудо 60 ияш лӱмгечыжым палемдыш. Галина Ильинична шке илышыже да пашаж нерген "Ӱдырамаш корно" лаштыкыште каласкала. ✅Морко район Кӱчыкэҥер ял гыч Эмма Семёнован кидпашалан шӱман улмыжым шукын палат. Эмма Анатольевна школыш коштмо годымак кӱнчылам шӱдыраш, носким, пижергым пидаш, ыресла тӱрлаш тӱҥалын. Тӱрлымӧ солык мучашеш кружеважым пидын. Ты пашалан шӱмаҥмыж нерген "Кидмастар" лаштыкыште лудса.