АММАҔА ӨБҮГЭ СИТИМЭ - ТУОС УРАҺА ТУРДА
АММАҔА ӨБҮГЭ СИТИМЭ - ТУОС УРАҺА ТУРДА ⚜️Амма уонна Таатта улуустарын, Болугур уонна Баайаҕа нэһилиэктэрин ситимниир Туос Моҕол Ураһа диэлин арыйан, балаҕан ыйын 25 күнүгэр бар дьонун түмэр Уруйдаах бэлиэ түһүлгэтэ, ил-эйэ аартыгын арыйар Айхаллаах дьоһун туоната буолан ааста. Саха киһитин санаатын сайар, дууһатын үөрдэр Моҕол Ураһаны саха норуотун тумус киһитэ, духуобунай лиидэрэ, тимир ууһа, ойууһут Б.Ф.Неустроев-Мандар Уус 50 сыллаах чинчийэр, үөрэтэр айанын түмүгүнэн, икки нэһилиэк иистэнньэҥнэрин сылаас тыынынан угуттанан, уран тарбахтаах мас уустарын мындыр сатабылларынан Кыыс Амма сиригэр-уотугар сиэрэ ситэн, оҥоһуллан турбутуттан норуот үөрүүтэ муҥура суох. Ыраахтан-чугастан тоҕуоруһа мустубут дьон-сэргэ Туос Моҕол Ураһа үйэлэри уҥуордаан, бүгүҥҥү кэнчээри ыччакка өбүгэбит духуобунай, материальнай култууратын кэпсии-ипсии туруоҕа диэн тутууга кыттыспыт дьоҥҥо махталларын, алгыстарын тиэртилэр. Амма улууһун салалтата Мандар Уус үлэтин сыаналаан, "За вклад в развитие Амгинского улуса" түөскэ анньынар бэлиэни туттардылар, сүктэр кыыс хаппахчытын тикпит иистэнньэҥнэр П.В.Макарова, Г.И.Андросова, Н.И.Дедюкина, А.В.Неустроева, Е.Д.Неустроева, П.П.Бурнашева Болугур нэһилиэгэ олохтообут "Туос ураһа - Махтал Бэлиэ" туһааннаахтарынан буоллулар. Үрдүк тэрээһиннээх, тылынан этиллибэт кэрэ бырааһынньыкка сылдьан, өбүгэ ситимэ дириҥин, улуутун, быстыбатын көрөн кэлэн киэн тутта кэпсээтилэр. //Маргарита Егорова, хаһыат общественнай корреспондена. @taattagazeta @ulusmedia