Күндү тыа хаһаайыстыбатын үлэһиттэрэ, крестьянскай уонна кэтэх хаһаайыстыбалар баһылыкт...
Күндү тыа хаһаайыстыбатын үлэһиттэрэ, крестьянскай уонна кэтэх хаһаайыстыбалар баһылыктара, оҥорон таһаарааччылар уонна үлэ бэтэрээннэрэ! Таатта улууһун дьаһалтатын, тус бэйэм ааппыттан Эһигини идэлээх бырааһынньыккытынан — Тыа хаһаайыстыбатын уонна оҥорон таһаарааччыларын күнүнэн итиитик-истиҥник эҕэрдэлиибин! Тыа сирин үлэтэ — хаһан баҕарар саха дьонун олоҕун тутула, чөл туругун төрдө уонна бигэ тирэҕэ. Сахабыт тыйыс усулуобуйатыгар сылгыны, ынаҕы көрүү-истии, үүнээйини олордуу, от оттооһун уонна аһылык бородууксуйатын оҥорон таһаарыы — бу чахчы дьиҥнээх патриотизм, тулуур уонна сүҥкэн сыра түмүгэ. Биһиги Тааттабыт сирэ былыр-былыргыттан үлэһит, туруу дьонунан аатырар. Улууспут бааһынайдара, сылгыһыттара, ыанньыксыттара, механизатордара уонна аһы-үөлү оҥорон таһаарааччылара улуус эрэ буолбакка, бүтүн Сахабыт сирин олохтоохторун ыраас, экологическай, минньигэс уонна туһалаах олохтоох бородууксуйанан хааччыйыыга үрдүк кылааты киллэрэллэр. Быйылгы сыл сайыҥҥы, күһүҥҥү күүстээх үлэтин түмүгэр, хаһаайыстыбалар оттооһуну, аһылык хаһааһыны этэҥҥэ түмүктээн, саҥа кыстыкка бэлэм киирдилэр. Бу ситиһии хас биирдиигит күннээҕи түбүктээх үлэҕит, төрөөбүт сиргитигэр тапталгыт күүһүнэн оҥоһулунна. Ордук улахан махталы уонна сүгүрүйүүнү тыа хаһаайыстыбатын бэтэрээннэригэр тиэрдэбин! Эһиги үйэлээх үгэстэри тутан, төрүт дьарыгы харыстаан, бүгүҥҥү көлүөнэҕэ үтүө сүбэһит, холобур буолаҕыт. Ытыктабыллаах тыа хаһаайыстыбатын үлэһиттэрэ! Эһиэхэ уонна эһиги дьиэ кэргэттэргитигэр сахалыы чэгиэн туругу, уостубат күүһү-күдэҕи, дьолу-соргуну баҕарабын! Хаһаайыстыбаларгыт чэчирии сайда, ынахсыт үүтэ, сылгыһыт сыһыыта дэлэйэ турдун! Иллээх үлэҕит түмүгэ куруук өлгөм үүнүүнэн, үрдүк ситиһиилэринэн төлөнө турдун! Таатта улууһун баһылыга Айаал Бурцев @taattagazeta