💠Экспертэргэ астарын туһунан иӈэн-тоӈон кэпсээтилэр, астарыттан амсаттылар.
💠Экспертэргэ астарын туһунан иӈэн-тоӈон кэпсээтилэр, астарыттан амсаттылар. Бэйэ сыра, ыыһаммыт куурусса этэ, дырыһааӈкы, оҕуруот аһыттан чипсы, убаһа сыата, араас эбиликтээх алаадьы, кыһыл харах балыктан наггетс, араас утахтар, моонньоҕонтон соус, индюк, тайах, сибиинньэ, убаһа этэ - быһата, ас эрэ амтаннааҕа, бастыӈа кулууп саалатын эргиччи сандалыны биир гына тэлгэннэ. Аныгы оҕоҕо арыы хайдах таптайыллан оӈоһулларын, сүөгэй хантан кэлэрин көрдөрөр баҕаттан субу манна харах далыгар хаһаайыстыба үлэһиттэрэ арыы оӈордулар, сүөгэй сүүртүлэр. Итиэннэ бэйэ аһа - сүөгэй, суорат, арыы, иэдьэгэй, үүт, сымыыт, салааттар, бурдук ас, "Туман" быырпах атыыта тэриллэн, хамаҕатык барда. Экспертэр хас биирдии кыттыбыт оҕоҕо туоһу суруктары, минньигэс сакалааттары туттардылар. Алын сүһүөх уонна үрдүкү кылаас оҕолоругар бастыӈ бырайыактаах, кэпсээннээх, астаах-үөллээх 6 кыттааччы бэлиэтэнэн, бэлэхтэри туттулар. Салгыы бу үлэлэрин сайыннаралларыгар, саӈа таһымӈа кытталларыгар баҕа санааларын эттилэр. Барыларыгар төрүт аһы өрө туталларыгар, тыа үлэтигэр сысталларыгар, маннык чобуотук кэпсииллэригэр махтаннылар. Онон нэһилиэк салалтатын (баһылыгы солб. А. И. Васильева) тэрийиитинэн, тыа хаһаайыстыбатын специэлииһэ Светлана Винокурова, кулууп, оскуола коллективын кыһамньыларынан, нэһилиэк бүттүүнүн өйөбүлүнэн, хаһаайыстыбалар көмөлөрүнэн, туһааннаах дьон көхтөөх кыттыыларынан бу сонун тэрээһин кэпсээн буолан, тэнийэрдии тэрилиннэ. Баһылыгы солбуйааччы Анна Ивановна бу тэрээһини улуус таһымыгар таһаарар баҕа баарын үллэһиннэ. @taattagazeta @ulusmedia