БҮГҮН, АЛТЫННЬЫ 23 КҮНҮГЭР КӨҤҮЛ ТУСТУУГА ААН ДОЙДУ ААНЫН АРЫЙСЫБЫТ, САХА ЧУЛУУ ТУСТУУГ...
БҮГҮН, АЛТЫННЬЫ 23 КҮНҮГЭР КӨҤҮЛ ТУСТУУГА ААН ДОЙДУ ААНЫН АРЫЙСЫБЫТ, САХА ЧУЛУУ ТУСТУУГА ИЛЛАРИОН ФЕДОСЕЕВ ТӨРӨӨБҮТЭ 75 СЫЛЫН ТУОЛАР БЭЛИЭ КҮНЭ Бу бэлиэ күн Илларион Федосеев төрөөбүт Тааттатыгар үбүлүөйдээх тэрээһиннэр саҕаланнылар. Күн бастакы аҥаарыгар И.Г. Федосеев оҕолоро, ыччаттара, Ытык Күөл олохтоохторо уонна ыалдьыттар Илларион Федосеев талааныгар сүгүрүйэллэрин, ытыктыылларын итиэннэ хаһан даҕаны умнубаттарын биллэрэн сибэкки дьөрбөтүн уурдулар. 14.00 чаастан көҥүл тустууга оскуола саастаах оҕолорго аһаҕас турнир аһыллыытын сиэрэ-туома ыытыллыаҕа. Манна 9 улуустан 250 тахса кыттааччы күөн көрсөөрү Таатта сиригэр айаннаан кэлбиттэр. Санатан эттэххэ, улуу тренер Д.П. Коркин иитиллээччитэ Илларион Федосеев 1969 сыллаахха АХШ Боулдер куоратыгар ыытыллыбыт көҥүл тустууга уолаттарга аан дойду бастакы чемпионатыгар 48 киилэҕэ чемпион үрдүк аатын ылбыта. Бу улахан таһымнаах түһүлгэҕэ бастакы ситиһии, саха дьонун-сэргэтин улаханнык сэргэхсиппитэ, үөрдүбүтэ уонна саҥа кыайыыларга кынаттаабыта. Аан дойду бастакы чөмпүйүөнэ Илларион Георгиевич Федосеевы үйэтитии үлэтэ тиһигин быспакка ыытыллар. Тааттатааҕы оҕо спортивнай оскуолатыгар кини аата иҥэриллибитэ. Билигин оскуола саҥа тутуллубут таас спортивнай уораҕайга көһөн киирэн кыайыы саҥа кирбиилэригэр дьулуһаллар.