ДЬОНУ ҮӨРДЭЭРИ
ДЬОНУ ҮӨРДЭЭРИ ❄️Алтынньы 27, 28 күннэригэр Тааттатааҕы лицей 10 кылааһын уолаттара, эр дьон учууталлар уонна техническэй үлэһиттэр кыттыһан биир санаанан муус ыллыбыт. Үтүө дьыала чэрчитинэн аҕа саастаах оскуолабыт бэтэрээн үлэһиттэригэр кыстык муустарын дьиэлэригэр илдьэн сааһылаатыбыт. Эрдэ маннык тэрээһиҥҥэ кытта илик буоламмын интэриэһиргээн барбытым. Үлэ чэпчэкитэ суох, ол эрэн олус туһалаах уонна дьону үөрдэр эбит диэн сыаналаатым. Мууһу эрбээһин, хостоон таһаарыы, кыралаан бэлэмнээһин, тиэйии барыта туспа албастардааҕын көрдүм-иһиттим, үөрэттим. Бу иннинэ аҕабын кытта хостуур син уопуттаахпын эрээри, атын ньымалар баалларын биллим. Тэҥ саастаах уолаттарбын кытта алтыһан, салгыҥҥа сүүрэн-көтөн астык күннэр буоллулар. Эбиэккэ оскуолабытыгар тиийэн остолобуойбут үлэһиттэрэ астаабыт минньигэс астарын тото–хана аһаан баран салгыы үлэлиир сылаата суох эбит. Учууталларбыт барытын быһааран, көрдөрөн биэрэллэр, чараас мууска сэрэхтээх буоларбытыгар үөрэттилэр. 🧊Бу тэрээһиҥҥэ кыттан мин туһалааҕы оҥорбуппуттан дуоһуйдум. Аҕам саастаах дьон үөрбүт–көппүт, махтаммыт сирэйдэрин көрөммүн, олуһун сүргэм көтөҕүлүннэ. Хаһаайыстыбаҕа наадалаах көмөнү оҥорон, кинилэргэ махталбытын биллэрэрбит, быдан ордук эбит диэн санааҕа кэллим. Каникулум икки күнэ көдьүүстээхтик ааспытыттан астынным. «Добролед» үтүөкэн дьыала акциятыгар кыттаммын волонтерскай чааспар 16 чаас эбилиннэ. Инникитин даҕаны маннык тэрээһиннэргэ кыттарга бэлэммин. Евсей Постников, Таатта лицейин 10 "а" кылааһын үөрэнээччитэ, "Умсулҕан" медиа бөлөх чилиэнэ. @taattagazeta @ulusmedia